Ndërlidhjet

VV: Qeveria Mustafa-Thaçi vazhdon të përndjekë opozitën


Pamje nga një prej seancave me gaz lotsjellës...

Pamje nga një prej seancave me gaz lotsjellës...

Lëvizja Vetëvendosje ka bërë të ditur për arrestimin e deputetit të opozitës, Pal Lekaj.

“Sot, Qeveria Mustafa-Thaçi arrestoi edhe një deputet të opozitës. Deputeti Pal Lekaj u dërgua para prokurorisë për shkak se ka kundërshtuar, së bashku me të gjithë deputetët e opozitës, 'Zajednicën; dhe demarkacionin me Malin e Zi”, thuhet në komunikatën e Vetëvendosjes.

Me 'Zajednicë', opozita i referohet Asociacionit të komunave me shumicë serbe, për formimin e të cilit Kosova është dakorduar me Serbinë.

Lëvizja Vetëvendosje, së bashku me dy partitë e tjera në opozitë, Aleancën për Ardhmërinë e Kosovës, së cilës i takon Lekaj, dhe Nismën për Kosovën, kundërshtojnë marrëveshjen për Asociacionin dhe marrëveshjen me Malin e Zi për demarkacionin e kufirit.

Opozita, tash e sa muaj, është duke penguar punën e Kuvendit me mjete të ndryshme.

Autoritetet e rendit kanë arrestuar disa deputetë të opozitës për shkak të hedhjes së gazit lotsjellës në ambientet e Kuvendit.

“Është shumë e rëndësishme për Kosovën që kjo Qeveri sa më parë ta kuptojë që nuk do të ketë rrugë tjetër përveçse të tërhiqet nga marrëveshjet me Serbinë dhe demarkacioni me Malin e Zi, si dhe t'i lirojë të gjithë të burgosurit politikë. Sa më shumë që vonon, aq më i madh do të jetë çmimi për Kosovën”, thuhet në komunikatën e sotme të Vetëvendosjes.

Lëvizja Vetëvendosje paralajmëron se nëse deputetët dhe disa aktivistë “të burgosur politikisht” nuk lirohen menjëherë, “situata do të përkeqësohet dhe tensionohet edhe më shumë”.

XS
SM
MD
LG