Diplomatë nga Pakistani, Afganistani, Shtetet e Bashkuara dhe Kina kanë zhvilluar sot bisedime në Islamabad në kuadër të përpjekjeve për hartimin e një plani për bisedimet e paqes në mes të qeverisë afgane dhe talibanëve.
Në takimin e mbajtur sot në kryeqytetin pakistanez morrën pjesë: Zëvendësministri i Jashtëm afgan, Hekmat Karzai, Sekretari i Jashtëm pakistanez, Aizaz Chaudhry si dhe zyrtarë të lartë nga Shtetet e Bashkuara dhe Kina. Talibanët nuk kanë marrë pjesë.
“Pjesëmarrësit theksuan nevojën e menjëhershme për bisedime të drejtpërdrejta në mes të përfaqësuesve të qeverisë afgane dhe përfaqësuesve të grupeve të talibanëve, në një proces paqeje që ka për qëllim ruajtjen e sovranitetit, unitetit dhe integritetit territorial të Afganistanit”, thuhet në një deklaratë të përbashkët të lëshuar pas takimit.
Bisedimet vijnë në kohën kur talibanët e kanë zhvilluar një fushatë vdekjeprurëse gjatë dimrit në Afganistan.
Analistët thonë se talibanët po bëjnë përpjekje që ta forcojnë dorën negociuese pas shtytjes ndërkombëtare për t’i ngjallur bisedimet e paqes.
Një proces i bisedimeve për paqe në vitin 2015 ishte ndërprerë papritur pas lajmit se udhëheqësi shpirtëror i talibanëve, Mullah Mohammad Omar, kishte vdekur dy vjet më parë.