Pakistani ka thënë se ka arrestuar anëtarë të një grupi militant, i cili besohet se qëndron prapa sulmit në një bazë ajrore të Indisë.
Kryeministri Nawaz Sharif ka thënë se disa individë, që i përkasin grupit Jaish-e-Mohammed, me bazë në Pakistan, janë arrestuar.
Shtatë ushtarë indianë janë vrarë në sulmin e 2 janarit në bazën ajrore Pathankot, në provincën Punxhab.
Nju Delhi ka thënë se sulmi është kryer nga grupi Jaish-e-Mohammed.
Sharif po ashtu ka thënë se Pakistani është duke shqyrtuar dërgimin e një ekipi të posaçëm në Pathankot për të kërkuar “informacione shtesë” për hetimet.
India akuzon Pakistanin se armatos dhe trajnon kryengritës në pjesën e tij të rajonit të diskutueshëm të Kashmirit.
Pakistani i hedh poshtë këto pretendime.
