Premtime për miliarda dollarë ndihma për refugjatët sirianë janë bërë në ditën e parë të konferencës së donatorëve në Londër.
Gjermania është zotuar se do të japë 2.6 miliardë dollarë, ndërsa Mbretëria e Bashkuar 1.7 miliard.
Shtetet e Bashkuara, në anën tjetër, janë zotiuar për 925 milionë dollarë, shumica e tyre për ushqim dhe strehim.
Qëllimi i konferencës së donatorëve është të mbledhë 9 miliardë dollarë për refugjatët.
Konferenca, megjithatë, ka mbetur në hije për shkak të ndërprerjes së bisedimeve për paqe midis qeverisë dhe opozitës siriane.
Bisedimet e ndërmjetësuara nga Kombet e Bashkuara janë ndërprerë të mërkurën në Gjenevë.
“Ditët e ardhshme duhet të përdoren për t’u kthyer në tryezë të bisedimeve, e jo për të siguruar më shumë fitore në fushën e betejës”, ka thënë sekretari i përgjithshëm i Kombeve të Bashkuara, Ban Ki-moon, në Londër.
Ofensiva e Qeverisë siriane, e mbështetur nga sulmet ajrore ruse, është duke vazhduar në qytetin Alepo.
Kryeministri turk, Ahmet Davutoglu, ka thënë se rreth 70,000 sirianë që ikin nga bombardimet, janë duke lëvizur drejt Turqisë.
