Presidenca e Rusisë e ka dënuar sulmin kundër politikanit opozitar rus, Mikhail Kasyanov, dhe tha se nuk ka arsye që incidenti të ndërlihdet me udhëheqjen çeçene.
Këto komente i ka bërë sot zëdhënësi i Kremlinit, Dmitry Peskov, pasi Kasyanovi ka pretenduar se një grup i njerëzve e ka sulmuar atë në një restorant moskovit, ku ai po darkonte, me ç’rast e kanë fyer për pikëpamjet e tij politike.
Kasyanov tha se sulmuesit e kanë gjuajtur me embëlsirë.
Raportohet se tre oficerë policë çeçenë janë arrestuar në Moskë lidhur me këtë incident dhe se është hapur një rast administrativ kundër tyre.
Kasyanov, ish-kryeministër i Rusisë nën presidentin, Vladimir Putin, që është shndërruar në kritik të ashpër të tij, tha se beson se sulmi ishte i ndërlidhur me kërkesën e tij që autoritetet federale të zhvillojnë hetime për një postim në rrjetin Instagram nga presidenti i Çeçenisë, Ramzan Kadyrov.
Në këtë postim të javës së kaluar, shihej një fotografi ku Kasyanov ishte në shënjestër të asaj që konsiderohet se ishte armë snajperike.