Presidentja e Kosovës, Atifete Jahjaga, me rastin e shënimit të 27 vjetorit të grevës së minatorëve të Trepçës, ka theksuar se duhet një platformë e re dhe një dialog i brendshëm për të ardhmen e Kosovës
Mëtutje, nëpërmjet një kumtese për media, zonja Jahjaga ka theksuar se Kosova duhet të mbetet lojal ndaj orientimit properëndimor - anëtarësimit në Bashkimin Evropian dhe në NATO.
“Na duhet t'i ripërtërijmë vazhdimisht vlerat që i vumë në themele të shtetësisë tonë. Me ngulm dhe guxim duhet ta bëjmë reformën e ekonomisë tonë për të garantuar që vendeve si Stantërgu dhe banorëve të përkushtuar të tij, tu kthehet shkëlqimi dhe krenaria që e gëzonin dikur. Nuk kemi alternativë pos të ndërtojmë shtet ligjor”, ka theksuar Jahjaga dhe ka shtuar se këto qëllime nuk janë të paarritshme, por ato kërkojnë më shumë angazhim e punë.
“Tani na duhet mobilizim po aq i qëndrueshëm dhe insistues që demokracinë tonë të brishtë dhe institucionet tona që duhet ta mbrojnë dhe avancojnë këtë demokraci, t'i forcojmë çdo ditë. Kjo është beteja jonë e radhës, beteja e së ardhmes, që varet nga ne dhe të cilën patjetër duhet ta fitojmë. Sepse ua kemi borxh juve, dhe ua kemi borxh gjeneratave që vijnë pas nesh”, ka thënë presidentja Jahjaga.