Aktivistët sirianë dhe mediat proqeveritare thonë se dhjetëra njerëz janë vrarë gjatë një vargu të eksplodimeve në qytetet Homs dhe Damask në Siri.
Observatori sirian për të drejtat e njeriut me seli në Londër tha sot se 57 vetë, shumica civilë, janë vrarë nga një sulm i dyfishtë me makinë-bombë në qytetin qendror Homs.
Disa orë më vonë, ky grup ka njoftuar se nga një sulm i kombinuar vetëvrasës me makinë – bombë, në një lagje me popullatë shumicë shiite në kryeqytetin Damask, janë vrarë së paku 30 vetë.
Nuk është e qartë se kush i ka kryer këto sulme, por grupi militant, Shteti Islamik, në të kaluar ka ndërmarrë sulme në të dy qytetet.