Presidenti i Shteteve të Bashkuara, Barack Obama, është shprehur i matur në lidhje me perspektivat e një marrëveshjeje për armëpushim në Siri.
“Situata në terren është e vështirë”, ka thënë Obama.
Këtë javë, Shtetet e Bashkuara dhe Rusia kanë ndërmjetësuar marrëveshjen, e cila bën thirrje për armëpushim midis forcave qeveritare të Sirisë dhe luftëtarëve opozitarë, nisur nga data 27 shkurt.
Militantët e Shtetit Islamik dhe ata të Frontit Al Nusra nuk janë pjesë e kësaj marrëveshjeje.
Obama ka thënë se pauza në luftime do t’i mundësonte ushtrisë amerikane dhe partnerëve të koalicionit që të përqendrohen më shumë në ekstremistët e Shtetit Islamik.
Obama i ka bërë këto komente pas takimit me Mbretin Abdullah të Jordanisë në Shtëpinë e Bardhë.
Jordania është partner i rëndësishëm i SHBA-së në fushatën e saj ajrore kundër militantëve të Shtetit Islamik në Siri.