Kuvendi në tension
Nën tensione politike dhe protesta në rrugë, Kuvendi i Kosovës pritet të votojë sot për presidentin e ri të vendit. Koalicioni qeverisës i përbërë nga dy partitë më të mëdha, Partia Demokratike dhe Lidhja Demokratike, me mbështetjen e komuniteteve pakicë, pritet që përmes votës të vërtetojnë nëse i kandiduari kryesor për këtë post, Hashim Thaçi do të zgjidhet presidenti i ri i Kosovës.
Kushtetuta e Kosovës parasheh votim të fshehtë për zgjedhjen e presidentit në një afat jo më vonë se tridhjetë ditë para përfundimit të mandatit të presidentit aktual, që në rastin konkret, nënkupton datën 7 mars.
Për nisjen e procedurës së votimit, duhet të ketë dy kandidatë për këtë post. Kësaj radhe, Partia Demokratike ka kandiduar liderin e saj Hashim Thaçi si dhe një zyrtar tjetër po nga kjo parti, Rafet Rama, i cili në këtë rast më shumë do të plotësojë procedurën ligjore e kushtetuese të kundër kandidatit.
Zgjedhja e presidentit bëhet me dy të tretat e votave të të gjithë deputetëve të Kuvendit. E në rast se asnjëri kandidat nuk merr shumicën prej dy të tretave në dy votimet e para, organizohet votimi i tretë. Në rrethin e tretë, kandidati që merr shumicën e votave të të gjithë deputetëve (61 vota), zgjedhet President i Republikës së Kosovës.
Nga të dy kandidatët, lideri i PDK-së, Hashim Thaçi mbetet favorit i padiskutueshëm për postin e presidentit.
Megjithatë, zgjedhjen e tij po e kundërshton ashpër opozita e cila pakënaqësinë e vet është deklaruar se do ta shpreh brenda Kuvendit si edhe në rrugë përmes protestave. Po ashtu, Thaçin president, nuk po e mbështet as një grup prej 6 deri në 8 deputetë të Lidhjes Demokratike.
Sidoqoftë, zgjedhja e Thaçit president, besohet se nuk do të vijë në diskutim, sidomos në rrethin e tretë, nëse sigurohet kuorumi prej 80 deputetëve të pranishëm në sallë për procedimin e votimit.
Në rast se ndodhë dështimi i zgjedhjes së presidentit, Kushtetuta parasheh shpërndarjen e Kuvendit dhe shpallen zgjedhjet e reja, të cilat duhet të mbaheshin brenda dyzet e pesë ditëve.
Video: Forca të shtuara të sigurisë kanë rrethuar objektin e Kuvendit të Kosovës, para fillimit të seancës për zgjedhjen e presidentit të Kosovës. Lëvizja Vetëvendosje, Aleanca për Ardhmërinë e Kosovës dhe Nisma për Kosovën, që të trija në opozitë kanë paralajmëruar protesta për të penguar zgjedhjen e presidentit.
Foto: Pamje nga një tendë para ndërtesës së Kuvendit të Kosovës dhe Qeverisë. Aktivistë nga radhët e partive politike në opozitë, kanë dalë para objektit të Kuvendit të Kosovës dhe Qeverisë, për të bllokuar zgjedhjen e presidentit të Kosovës.
Protestuesit nisit të grumbullohen para Kuvendit
Partitë opozitare dhe mbështetësit e tyre, tashmë kanë filluar të mblidhen para ndërtesës së Kuvendit ku në orën 11:00 pritet të nis procedura e zgjedhjes së presidentit të ri të Kosovës. Opozita po e kundërshton ashpër zgjedhjen e presidentit dhe kandidatit për këtë post, Hashim Thaçi, lider i Partisë Demokratike të Kosovës.
Protesta po përcillet nga afër nga forcat e policisë së Kosovës, përfshi edhe ato të njësive speciale të cilat janë vendosur brenda oborrit të Kuvendit.