Autoritetet turke kanë arrestuar tre akademikë nën akuzat për “propagandë terroriste".
Akademikët kanë lexuar publikisht një deklaratë që bën thirrje për fundin e operacioneve të sigurisë në juglindje të Turqisë, rajon i banuar me shumicë kurde.
Policia po ashtu ka ndaluar dhe marrë në pyetje një shtetas britanik.
Qeveria e Turqisë fajëson grupin militant Partia e Punëtorëve të Kurdistanit për sulmin vetëvrasës në Ankara më 13 mars, i cili ka lënë të vrarë 37 veta.
Përgjegjësinë për këtë sulm nuk e ka marrë ende asnjë grup.
Mbi 2,000 akademikë kanë nënshkruar një peticion në muajin janar, i cili kritikon veprimet e ushtrisë në juglindje.
Qindra civilë, forca të sigurisë dhe rebelë janë vrarë prejse konflikti me Partinë e Punëtorëve të Kurdistanit është rindezur në muajin korrik.
Peticioni ka zemëruar presidentin turk, Recep Tayyip Erdogan, i cili ka thënë se akademikët do të paguajnë çmimin për “tradhtinë” e tyre.