Shërbimet e sigurisë në Republikën Çeke janë duke punuar në mënyrë të jashtëzakonshme dhe kryeministri Bohuslav Sobotka ka shpallur nivelin e parë të kërcënimit nga terrorizmi.
Ministria e Brendshme e Çekisë ka thënë se nuk ka ndonjë informacion specifik se Çekia mund të jetë shënjestër e radhës e sulmeve terroriste dhe se të gjithë hapat janë vetëm parandalues.
Policia ka rritur sigurinë në Aeroportin e Pragës dhe në stacionet e metrosë, pas sulmeve të së martës në Bruksel, të cilat kanë lënë të vrarë 34 veta.
Siguria është rritur edhe në aeroportet e tjera ndërkombëtare në Çeki, ndërsa fluturimet nga Belgjika dhe Franca kontrollohen në mënyrë të veçantë.
Ministria e Jashtme e Çekisë ka thënë se nuk ka ndonjë informacion nëse shtetas çekë janë vrarë ose plagosur nga shpërthimet në Bruksel.
