Ndërlidhjet

Mbi 60 të vrarë nga sulmi në një park në Pakistan

  • RFE /RL

Autoritetet në Pakistan kanë bërë të ditur se nga një sulm i dyshuar vetëvrasës janë vrarë së paku 65 persona, shumica e tyre gra dhe fëmijë, si dhe janë plagosur qindra të tjerë.

Sulmi ka ndodhur në një park publik në qytetin e Lahores, ku të krishterët kanë qenë duke festuar Pashkët.

Një degë e talibanëve pakistanezë ka marrë përgjegjësinë për sulmin e së dielës, duke thënë se ka sulmuar qëllimisht të krishterët në parkun Gulshan-e-Iqbal.

Ahsanullah Ahsan, zëdhënës i fraksionit taliban që e quan veten Jamat il Ahrar, ka paralajmëruar se grupi mund të kryejë sulme të tjera dhe se sulmi i fundit ka qenë “mesazh” për kryeministrin Nawaz Sharif, i cili e konsideron provincën Punxhab dhe kryeqytetin e saj Lahore si bastion të tij politik.

Shpërthimi ka ndodhur në portën kryesore të parkut, në një zonë ku zakonisht lihen makinat dhe në një distancë të shkurtër nga këndi i fëmijëve.

Shtëpia e Bardhë e ka dënuar sulmin duke e cilësuar si “frikacak” dhe është zotuar se do të punojë me Pakistanin "për t’i mposhtur ata që terrorizojnë vendin".

“Shtetet e Bashkuara e dënojnë në termat më të fuqishëm sulmin e sotëm terrorist në Lahore të Pakistanit”, ka thënë Ned Price, zëdhënës i Këshillit për Siguri Kombëtare të presidentit të SHBA-së, Barack Obama.

“Ky akt qyqar në një park që prej kohësh ka qenë i qetë, ka lënë të vrarë dhjetëra civilë të pafajshëm dhe të plagosur dhjetëra të tjerë”, ka shtuar ai.

Pamjet e mediave dhe dëshmitarët kanë treguar skena të tmerrshme të masakrës.

Fëmijë dhe gra janë parë duke qëndruar në pishina gjaku, duke qarë dhe bërtitur. Ekipet e shpëtimit, policia dhe kalimtarë kanë bartur të plagosur me auto-ambulanca dhe makina private.

Pakistani ka vuajtur vazhdimisht nga dhuna që lidhet me talibanët, grindjet sektare dhe aktivitetin e bandave kriminale.

Përgatiti: Valona Tela
XS
SM
MD
LG