Azerbajxhani ka akuzuar separatistët e përkrahur nga Armenia se e kanë shkelur armëpushimin e arritur ndërmjet të dyja vendeve, për Nagorno-Karabakhun.
Ministria e Mbrojtjes e Azerbajxhanit ka thënë sot në një deklaratë se separatistët e kanë shkelur armëpushimin 119 herë gjatë 24 orëve të fundit.
Ndërsa, Ministria e Mbrojtjes pohon se forcat armene kanë granatuar disa distrikte në enklavën Nakhchivan të Azerbajxhanit.
Nakhchivan është i rrethuar nga Armenia, Irani dhe Turqia.
Që nga hyrja në fuqi e armëpushimit më 5 prill, Azerbajxhani dhe separatistët në Nagorno-Karabakh kanë thënë se situata atje është e qetë, pavarësisht tensioneve.