Presidenti i Iranit, Hassan Rohani, ka lavdëruar numrin rekord të grave që do të jenë pjesë e parlamentit të ri të vendit.
“Për herë të parë, ne kemi 18 gra në parlament, dhe kjo është një shifër rekorde e na bën neve të lumtur”, ka thënë Rohani në Teheran, duke shtuar se shpreson që më shumë gra do të inspirohen e të përfshihen në politikë.
Një numër prej katër femrash u zgjodhën në rrethin e dytë të votimeve më 29 prill, duke iu bashkuar numrit të mëhershëm prej 14 femrave që ishin zgjedhur gjatë rrethit të parë të votimeve.
Në përbërjen e kaluar të parlamentit iranian, vetëm nëntë gra ishin pjesë e legjislaturës prej 290 ulësesh.
Që të gjitha 18 femrat deputete vijnë ose nga fraksioni reformist i Rohanit, ose janë deputete të pavarura.
Asnjë nga femrat kandidate të linjës së ashpër nuk arritën të fitonin ulëse në mandatin e këtij parlamenti.
Pvarësisht kësaj shifre rekorde, përqindja e vogël e femrave deputete në Iran zbehet në krahasim me ato në vendet perëndimore.
