Ndërlidhjet

logo-print

CBS kërkon falje për shakanë e bërë për Srebrenicën


Ilustrim (Pamje nga eposiodi në fjalë)

Ilustrim (Pamje nga eposiodi në fjalë)

Producenti i një seriali komik të rrjetit televiziv amerikan CBS ka kërkuar falje lidhur me shakatë e bëra për Masakrën e Srebrenicës.

Boshnjakët në Evropë dhe në Amerikën e Veriut kanë reaguar me zemërim pas transmetimit të një episodi të serialit “Çifti i çuditshëm”, muajin e kaluar.

Në këtë episod, një personazh mashkull e fton në takim një vajzë në një restorant serb, i quajtur “Shija e Srebrenicës”.

Ai gjithashtu e shqipton keq emrin e qytetit në të cilin janë vrarë mbi 8,000 burra dhe djem myslimanë nga forcat serbe të Bosnjës në vitin 1995.

Në deklaratën e CBS-it, dërguar Radios Evropa e Lirë, producenti Bob Daily thotë:

“Nuk kemi pasur dijeni për çfarëdo lidhjeje me tragjedinë e tmerrshme në Srebrenicë. Ne kurrë nuk do të shpërfillnim me qëllim një ngjarje të tillë dhe sinqerisht i kërkojmë falje kujtdo që është ofenduar”, ka thënë Daily.

“Të thuash eja të shkojmë në një restorant të ri të quajtur ‘Shija e Srebrenicës’ është njësoj sikurse të thuash diçka të tmerrshme të llojit: Eja të shkojmë në një restorant të ri gjerman të quajtur ‘Shija e Auschwitzit’,” ka thënë përmes një letre të hapur Kongresi i Boshnjakëve të Amerikës së Veriut, i cili përfaqëson migrantët dhe refugjatët nga ky rajon i ish-Jugosllavisë.

I kontaktuar nga Radio Evropa e Lirë, CBS nuk ka dhënë menjëherë përgjigje ndaj një kërkese përmes emailit, për të komentuar lidhur me episodin në fjalë.

Në vitin 2004, tribunali i Kombeve të Bashkuara që merret me krimet e luftës në ish-Jugosllavi, ngjarjet e Srebrenicës i ka cilësuar zyrtarisht si gjenocid.

Ju mund ta lexoni edhe këtë:

Shakaja pa shije e serialit amerikan e quajtur "Shija e Srebrenicës”

XS
SM
MD
LG