Ndërlidhjet

logo-print

Kosovë: Është arrestuar një person britanik i dyshuar për pedofili


Policia e Kosovës thotë se e ka arrestuar një person nga Britania “i dyshuar për veprën keqpërdorim seksual të personave nën moshën 16 vjeçare”.

Zëdhënësi i Policisë së Kosovës, Daut Hoxha, në një përgjigje me shkrim për Radion Evropa e Lirë, ka theksuar se ky arrestim është bërë “me urdhërarrest evropian dhe i kërkuar nga Britania e Madhe”.

Zoti Hoxha thotë se “pas pranimit të informacioneve nga shteti i Britanisë dhe një hetimi që është bërë nga Policia e Kosovës, personi është arrestuar në qytetin e Pejës”.

Në njoftimin e zdhënësit Hoxha thuhet se për këtë zhvillim është njoftuar prokurori kompetent, ndërsa “personi i dyshuar dërgohet në mbajtje me qëllim të inicimit të procedurave për ekstradim”.

Nga ana tjetër, agjencia AFP nga Prishtina raporton se personi i arrestuar është prift katolik nga Britania dhe është i akuzuar për abuzime seksuale kundër fëmijëve në Britani.

Mëtutje, duke e cituar shefin e drejtoratit të Policisë së Kosovës për bashkëpunim ndërkombëtar, Veton Elshani, kjo agjenci raporton se ky person “është i njohur si Ati Laurence dhe është i lindur në vitin 1943”.

Zoti Elshani ka njoftuar se “prokurori publik ka urdhëruar ndalimin e tij derisa gjykata të vendos për ekstradimin e tij”.

Sipas ligjit, procedura e ekstradimit mund të zgjasë së paku 40 ditë.

XS
SM
MD
LG