Nga një sulm vetëvrasës, për të cilin përgjegjësinë e ka marrë grupi ekstremist, Shteti Islamik (IS), janë vrarë së paku 15 vetë në qytetin Mukalla, në pjesën jugore të Jemenit.
Duket se shumica e viktimave ishin rekrutë që pritnin para selisë së policisë.
Në një mesazh në agjencinë e vet të lajmeve, Amaq, grupi esktremist, Shteti Islamik, tha se sulmuesi, që e ka aktivizuar eksplozivin në trupin e tij, synonte të bëhej “martir”.
Ky qytet për një kohë të gjat ishte bazë e militantëve të al-Kaidës, por muajin e kaluar, ata u dëbuan gjatë një ofensive ushtarake të trupave qeveritare, me mbështetje të Emirateve të Bashkuara Arabe.
Nga ana tjetër, militantët e degës së Shtetit Islamik në Jemen, kanë ndërmarrë një varg të sulmeve vetëvrasëse në të gjitha anët e Jemenit, i cili është i përfshirë në luftë civile.
Ushtria e Shteteve të Bashkuara, javën e kaluar, ka shpallur vendosjen e një numri të vogël të ushtarëve në Jemen për të ndihmuar në luftën kundër al-Kaidës në Gadishullin Arab.