Shtetasi kosovar, Ardit Ferizi, pritet të deklarohet mbi akuzat për terrorizëm kundër tij.
Ferizi, 20 vjeç, dyshohet se ka depërtuar në të dhënat e mbi 1,300 pjesëtarëve të ushtrisë amerikane dhe se të njëjtat i ka shpërndarë te grupi militant Shteti Islamik.
Seanca dëgjimore për Ferizin do të mbahet më 15 qershor në Gjykatën e Qarkut në Virxhinia.
Ai fillimisht është deklaruar i pafajshëm ndaj akuzave për sigurimin e mbështetjes materiale për terroristët.
Prokurorët thonë se Ferizi, vitin e kaluar, ka depërtuar në të dhënat e një kompanie private dhe se ka siguruar emrat, fjalëkalimet e emaileve dhe numrat e telefonit të 1,351 ushtarëve amerikanë.
Shteti Islamik më pas i ka publikuar këto të dhëna në Twitter, së bashku me kërcënime kundër ushtarëve.
Ferizi është arrestuar në Malajzi në muajin tetor dhe është dërguar në Shtetet e Bashkuara në janar.
Departamenti amerikan i Drejtësisë e ka cilësuar rastin si të parin të këtij lloji.
