Pesë oficerë të policë janë vrarë dhe 6 të tjerë janë plagosur nga të shtënat me snajperë, gjatë protestës kundër dy vrasjeve aktuale të personave afrikano-amerikanë nga policia, kanë thënë autoritetet e Shteteve të Bashkuara.
Policia në Dallas tha se së paku dy snajperë kanë shtënë “në stilin e pritës” kundër oficerëve mbrëmë vonë.
Tre të dyshuar janë arrestuar, ndërsa i katërti kishte shkëmbyer të shtëna me pjesëtarët e rendit në një vend parkimi në qendër të qytetit, tha sot herët në mëngjes, shefi i policisë së Dallasit, David Brown.
Policia, po ashtu, tha se ekipi i hetimeve po e shqyrton një pako të dyshuar të gjetur afër vendit ku ishte një i dyshuar.
Të shtënat kanë ndodhur derisa në disa qytete amerikane mbrëmë janë mbajtur protesta, kryesisht paqësore.
Me këto protesta kundërshtohej vrasja e dy personave afrikano-amerikanë nga policia.
Një rast ka ndodhur afër vendit St. Paul në Minesotë më 6 korrik, kur është vrarë Philando Castile.
Dashnorja e tij, Diamond Reynolds, në mediat sociale e ka postuar një video ku shihet Castile duke vdekur në rrëke të gjakut.
Një ditë më parë, më 5 korrik, është vrarë Alton Sterling, pas një grindjeje me policët e bardhë në Baton Rouge në Luizianë.
Presidenti amerikan, Barack Obama, këto vrasje i ka cilësuar si tragjike.
“Të gjithë ne si amerikanë duhet të jemi të shqetësuar nga këto të shtëna, pasi ato nuk janë incidente të izoluara. Ato janë shenjë e një kompleksi të gjërë të pabarazive, që ekzistojnë në sistemin tonë gjyqësor penal”, tha Barack Obama.
