Ndërlidhjet

Qeveria pajtohet të shtyjë procedimin e ratifikimit të Demarkacionit


Kryeministri i Kosovës, Isa Mustafa ka mbështetur shtyrjen për pak kohë të procedimit në Kuvend për ratifikim të Marrëveshjes për Demarkacionin e kufirit me Malin e Zi, përderisa të hapet edhe një debat publik me ekspertët.

Megjithatë, Mustafa sërish ka shprehur bindjen e tij se me marrëveshjen aktuale për Demarkacion, Kosova nuk ka humbur territor, siç pretendon opozita apo edhe disa deputetë të partive në pushtet.

“Ne, për këtë mbledhje e kemi pas planifikuar që të trajtojmë edhe ligjin për ratifikimin e marrëveshjes për shënimi e vijës kufitare me Malin e Zi, i cili ligj është përgatitur nga Ministria e Punëve të Jashtme”, ka thënë Mustafa në mbledhjen e qeverisë.

Ndërkohë, sipas tij, partnerët e koalicionit, Partia Demokratike dhe Lidhja Demokratike janë pajtuar që të shqyrtohen edhe mundësitë shtesë para se Marrëveshja të procedohet në Kuvend.

“Kemi vlerësuar se ka mundësi që akoma të shfrytëzojmë këtë hapësirë dhe të studiojmë të gjitha mundësitë që me ligj të shohim hapjen e mundësive për të argumentuar vërtetë që ligji mund të përfshijë argumentimin e fakteve, që do të mundësonin që në të ardhmen ndërmjet Kosovës dhe Malit të Zi të krijohen situata në të cilat ne do të mund të bisedonim dhe të rishikonim pjesë të caktuara të marrëveshjes në bazë të interesit dypalësh”, është shprehur Mustafa.

Pavarësisht shtyrjes së procedimit në kuvend, kryeministri Mustafa, beson se me demarkimin e kufirit me Maqedoninë dhe tani me Malin e Zi, Kosova nuk ka humbur, por ka shtuar territor.

Sipas kryeministrit, bazuar në shifra zyrtare, Kosova kishte 10 mijë e 887 kilometra katror, kurse tani shifrat e Komisionit shtetëror prezantojnë territor prej 10.906 kilometra katrorë.

“Prandaj që të mos manipulohet me ndjenjat e qytetarëve edhe si kryeministër, por edhe si Qeveri do të kërkojmë nga opozita që të tregojë lidhur me territorin edhe të tregojë se sa është territori i Kosovës tani sipas tyre”, ka thënë Mustafa.

Sidoqoftë, me gjithë paralajmërimet, ratifikimi i Marrëveshjes për Demarkacionin e kufirit me Malin e Zi është shtyrë për pak kohë përderisa të sqarohen fillimisht dilemat dhe të arrihet konsensusi politik brenda koalicionit qeveritar.

  • 16x9 Image

    Zijadin Gashi

    Zijadin Gashi, i lindur më 1973 në Prishtinë. Me gazetari ka filluar të merret që nga viti 1997, duke u angazhuar fillimisht nëpër mediat lokale. Si korrespondent i Radios Evropa e Lirë punon që nga maji i vitit 2001. Kryesisht ka mbuluar aktualitetin politik në Kosovë.

    Nga 1 shkurti 2016, është emëruar shef i Byrosë së Radios Evropa e Lirë, në Prishtinë. Ai është i martuar dhe ka 3 fëmijë.

Facebook Forum

XS
SM
MD
LG