Ndërlidhjet

Pakistan: Arriti në 53 numri i personave të vrarë


Avokatët duke e ndihmuar një koleg të plagosur nga sulmi i sotëm vetëvrasës
Avokatët duke e ndihmuar një koleg të plagosur nga sulmi i sotëm vetëvrasës

Së paku 53 vetë janë vrarë nga sulmi vetëvrasës në hyrjen kryesore të një spitali në qytetin Kueta, në pjesën jugperëndimore të Pakistanit.

Zyrtarët thanë se nga sulmi i sotëm janë plagosur më se 100 të tjerë dhe shumica prej tyre janë në gjendje kritike shëndetësore.

Sipas tyre, sulmi kishte ndodhur pak kohë pasi trupi i një avokati të njohur të vrarë ishte sjellë në spital.

Ministri provincial i brendshëm, Sarfraz Bugti, e ka dënuar sulmin, duke e cilësuar si “akt të terrorizmit”.

Askush nuk e ka marrë menjëherë përgjegjësinë për këtë sulm kundër spitalit.

Autoritetet në provincën Baloçistan thanë se po zhvillohen hetime.

Po ashtu, ende mbetet e panjohur se kush kishte dorë në vrasjen e avokatit, Bilal Kasi, i cili u qëllua sot më herët, me të shtëna nga arma, derisa shkonte në gjykatë.

Stacionet lokale televizive kanë transmetuar pamje ku shihen njerëzit duke vrapuar në rrëmujë nëpër oborrin e spitalit.

Policia tha se pjesa më e madhe e të vrarëve ishin avokatë, që ishin tubuar pasi trupi i kolegut të vrarë Kasi ishte sjellur në spital.

Asociacioni i avokatëve ka shpallur 7 ditë zie dhe një ditë të bojkotit në gjykatat në gjithë Pakistanin, në shenjë të protestës kundër vrasjeve.

XS
SM
MD
LG