Ndërlidhjet

logo-print

Përfaqësues të institucioneve të Kosovës të cilët kanë marrë pjesë në ceremoninë e shenjtërimit të Nënës Terezë në postimet e tyre në rrjetet sociale e konsiderojnë shenjtërimin e Nënës Terezë si njërën nga ditët më të rëndësishme për shqiptarët.

Ata kanë theksuar se shqiptarët janë popull me fat që botës i kanë dhënë Nënën e Paqes.

Presidenti i Kosovës Hashim Thaçi thekson se bashkë me shenjtërimin e Nënës Terezë u shenjtërua edhe prejardhja e saj shqiptare.

“Populli ynë i dha botës një nënë të dashur për gjithë popujt. I dha një mrekulli, që me rrugën e saj fisnike ishte simbol i mirësisë dhe mishërim i vetive më të mira njerëzore”, ka shkruar presidenti Thaçi në llogarinë e tij në Dacebook.

Papa Françesku në Sheshin e Shën Pjetrit në Vatikan të dielën ka shenjtëruar Nënë Terezë.

Qindra mijëra pelegrinë u mblodhën në Romë për të parë kanonizimin e Nënës Terezë, murgeshës që tërë jetën e saj ia përkushtoi ndihmës për të varfërit në Indi.

Në ceremoninë e shenjtërimit të Nënë Terezës ka marrë pjesë edhe një delegacion nga Kosova dhe Ipeshkvia e Kosovës.

Kryeministri i Kosovës Isa Mustafa pas shenjtërimit të Nënës Terezë, në profilin e tij në Facebok ka shkruar se që nga tani bota mbarë ka simbolin e shenjtë të dashurisë, besimit, humanizmit, vetëmohimit.

“Jeta dhe vepra e jashtëzakonshme e Shën Terezës në shërbim të njerëzimit, u nderua nga qindra mijëra njerëz të mbledhur në Sheshin e Shën Pjetrit në Vatikan. Shqiptarët tashmë e kanë shenjtoren e tyre e cila do të vazhdojë të na prijë në përsosjen e vlerave shpirtërore, morale e humane”, ka shkruar kryeministri Mustafa.

Derisa, kryetari i Kuvendit të Kosovës, Kadri Veseli ka thënë se “Shën Tereza dhe trashëgimia e saj tashmë janë shenjtëruar”.

“Jemi krenar që nga sot Shën Tereza shton radhën e shenjtorëve që populli shqiptarë i dha botës, duke lartësuar misionin e paqes dhe dashurinë. Misioni i saj buroi nga ndjenja më fisnike, e mbrojtur në lashtësinë e traditën e popullit tonë, solidarizim me të pafuqishmin, kujdes për të pambrojturin dhe dashuri për të përbuzurin. Nga sot, ne dhe gjithë bota i përkulemi jetës dhe veprës së saj në dobi të njerëzimit”, ka shkruar Veseli në rrjetin social Facebook.

I pranishëm në ceremoninë e shenjtërimit të Nënës Terezë ka qenë edhe kryetari i Lëvizjes Vetëvendosjes, Visar Ymeri.

Ai në profilin e tij në Facebook ka shkruar se “pas kësaj ceremonie, Tereza na bën krenarë, por edhe na detyron të shikojmë si ajo".

“Nënë Tereza u shenjtërua sot. Ajo personifikon dashurinë, përkushtimin, vetëmohimin e sakrificën; të gjitha këto në funksion të ndihmës ndaj të varfërve, të nëpërkëmburve, atyre që bota i harron, që nuk i sheh. Nëna jonë jo që nuk i harroi, por jetoi me ta. Dhe kështu i bëri te dukshëm, i ktheu në botë”, ka theksuar ai.

Një postim në rrjetin social Facebook e ka bërë edhe profesori në Fakultetin e Studimeve Islame në Universitetin e Prishtinës, Xhabir Hamiti.

Ai ka shkruar se ndihet i nderuar me respektin dhe konsideratën më të lartë që po i bën Selia botërore katolike në Vatikan misionares dhe humanistes së shquar shqiptare.

“Kanonizimi i Gonxhe Bojaxhiut, e njohur tanimë në Botë me emrin Mother Theresa. Si qytetar shqiptar, ndihem i nderuar me respektin dhe konsideratën më të lartë që po i bënë selia botërore katolike në Vatikan, misionares dhe humanistes së shquar të shekullit të kaluar, me gjenezë shqiptare".

"Suksesi ynë individual shqiptar në botë, historikisht është shumë më i shquar sesa ai kolektiv. Uroj që në të ardhmen të jemi më të bashkuar për të mirën tonë të përbashkët”, ka shkruar Hamiti.

Edhe, ish presidentja e Kosovës Atifete Jahjaga e ka quajtur këtë ditë si një ditë të rëndësishme për shqiptarët dhe gjithë njerëzimin.

Ajo ka thënë se shenjtërimi i Nënë terezës nga Papa Fraçesku “vulos atë që e kemi ndjerë gjithmonë: Nënë Tereza është e shenjtë për të gjithë njerëzimin”.

“Sot u bëmë dëshmitarë të shenjtërimit të Nënë Terezës- humanistës dhe misionares shqiptare, e cila hyri në zemrat tona me dashurinë e pakusht dhe kontributin e parreshtur të saj për njerëzit në nevojë”, ka shkruar Jahjaga

Nënë Tereza ishte dekoruar me çmimin Nobel për Paqe në vitin 1979, ndërsa ishte lumturuar nga Papa Gjon Pali në vitin 2003, pasi që Selia e Shenjtë kishte pranuar se falë ndërhyrjes së mbinatyrshme të saj, ajo kishte shëruar një grua indiane.

Në vitin e kaluar, më 17 dhjetor 2015, Papa Françesku ia njohu Nënës Terezë edhe mrekullinë e dytë, përkatësisht shërimin e jashtëzakonshëm të një të riu brazilian, më 9 dhjetor 2008.

Njohja e mrekullisë së dytë nga Selia e Shenjtë i hapi rrugë shenjtërimit të Nënës Terezë. (REL)

  • 16x9 Image

    Luljeta Krasniqi - Veseli

    Luljeta Krasniqi, e lindur më 02.05.1981. Me gazetari ka filluar të merret që nga viti 2005. Për një kohë të gjatë ka punuar si gazetare në Agjencinë e lajmeve Kosovalive. Ekipit të Radios Evropa e Lirë i është bashkuar në vitin 2008.

Facebook Forum

XS
SM
MD
LG