Uashingtoni dhe Tokioja po kërkojnë masa “më të fuqishme të mundshme” kundër Koresë Veriore, pas testit të fundit atomik të saj, tha sot një zyrtar amerikan.
Sung Kim, përfaqësues special i Departamentit amerikan të shtetit për politikën për Korenë Veriore, po ashtu, ka sugjeruar se Shtetet e Bashkuara mund të imponojnë sanksione të tyre kundër Phenianit.
Pas takimit me kolegun e tij japonez, Kenji Kanasugji, në Tokio, zoti Kim u tha reporterëve se Tokioja dhe Uashingtoni do t’i koordinojnë përgjigjet e tyre.
“Ne do të punojmë së bashku për së afërti në Kshillin e Sigurimit dhe jashtë tij, për masa më të fuqishme të mundshme kundër aksionit të fundit të Koresë Veriore”, tha Sung Kim.
Pardje, Këshilli i Sigurimit i Kombeve të Bashkuara fuqishëm e ka dënuar provën e fundit atomike dhe ka diskutuar për “masa të rëndësishme”, përfshirë sanksione të reja kundër Phenianit.
Tashmë Koreja Veriore është e goditur nga pesë lloje të sanksioneve të Kombeve të Bashkuara, prej testit të saj të parë bërthamor në vitin 2006.
Por, Pheniani insiston se do t’i vazhdoj provat atomike.