Ndërlidhjet

logo-print

Koalicioni i udhëhequr nga SHBA përgatitet të marrë qytetin Raqqa, ofenziva në Mosul vazhdon

  • RFE /RL

Raqqa

Raqqa

Koalicioni i udhëhequr nga SHBA-ja kundër grupit militant Shteti Islamik, ka paralajmëruar se po përgatitet pë rtë nisur një operacion për të marrë qytetin Raqqa të Sirisë.

Përgatitjet për të marrë Raqqan, bastion i fuqishëm i IS-it në Siri, po bëhen në kohën e ofenzivës së madhe kundër ekstremistëve në qytetin Mosul të Irakut.

Sekretari amerikan i mbrojtjes, Ash Carter, tha në një konferencë me gazetarë në Paris se të dy operacionet do të kryhen “paralelisht”.

“Do të bëhet njëkohësisht dhe është pjesë e planit tonë, prandaj edhe jemi të përgatitur”, tha Carter pas takimit me ministrat e mbrojtjes nga 13 vende që i janë bashkuar koalicionit të udhëhequr nga SHBA-ja për të luftuar militantët e IS-it.

“Kemi filluar përgatitjen e terrenit për partnerët tanë që të nisin izolimin e Raqqas”, tha Carter.

Ai tha se operacioni në Raqqa do të kryhet nga “forcat e afta dhe të motivuara locale të cilat i identifikojmë dhe i mundësojmë”.

Carter nuk ka ofruar specifika të tjera se kur do të fillojë operacioni për rimarrjen e Raqqas.

Presidenti francez, Francois Hollande, tha se ishte e nevojshme që të shihet përtej marrjes vetëm të Mosulit.

“Raqqa do të jetë bastioni i fundit i Daesh-it nëse Mosuli bie”, tha Hollande duke përdorur akronimin arab për grupin IS. “Daesh duhet të eliminohet gjithkund. Çdo qendër paraqet kërcënim”. tha Hollande.

Komentet e tij pasojnë lëvijen përpara të forcave qeveritare irakiane drejt Mosulit, bazës së fundit të IS-it në Irak.

Luftimet vazhduan të marten në një brez të fshatrave dhe qyteteve në veri, lindje dhe jug të Mosulit, qytetit të dytë më të madh në Irak.

Gjeneral majori, haidar Fadhil, tha se forcat speciale irakiane i janë afruar një fshati rreth 6 kilometra në lindje të Mosulit.

Fadhil tha, gjithashtu, se rreth 335 civilë janë evakuar në një kamp refugjatësh nga fshati Tob Zawa, rreth 9 kilometra larg Mosulit, që u rimorr nga forcat speciale më 24 tetor.

Fushata për të marrë nën kontroll Mosulin, ka hyrë në ditën e nëntë, dhe pritet që të vazhdojë më javë nëse jo muaj. (REL)

XS
SM
MD
LG