Ndërlidhjet

Asociacioni qytetar "MOST", i cili këto 15 vitet e fundit ka vëzhguar proceset zgjedhore në Maqedoni me numrin më të madh të vëzhguesve, ka bërë të ditur të premten se edhe zgjedhjet e parakohshme të 11 dhjetorit, do ti monitorojë me 3 mijë e 300 vëzhgues.

Kryetari i këtij asociacioni, Darko Aleksov, tha se tanimë 80 vëzhgues të asociacionit MOST janë shpërndarë në të gjitha komunat e vendit dhe kanë filluar të monitorojnë aktivitet e partive politike, punën e institucioneve shtetërore si dhe aktivisteve të organeve zgjedhore.

Duke iu përgjigjur interesimit të gazetarëve se sa zgjedhjet mund të jenë legjitime pa u balancuar gjashtë njësitë zgjedhore aq sa ka Maqedonia, kryetari i MOST-it, Darko Aleksov tha se parregullsia e zgjedhjeve nuk varet vetëm nga njësia zgjedhore numër gjashtë, por nga më shumë komponentë që janë pjesë e procesit.

“Asociacioni qytetarë MOST disa herë ka reaguar drejt parlamentit të Maqedonisë si organ i cili është i thirrur që të veprojë ndaj lëshimeve që janë bërë në njësinë zgjedhore numër gjashtë. Por, parlamentarët nuk e panë të arsyeshme të ndërmarrin veprime për ta përmirësuar këtë situatë. Ndërkohë që 110 deputetë votuan për shpërndarjen e Parlamentit dhe me këtë edhe shkuarjen në zgjedhje pa e zgjidhur këtë çështje. Kjo do të thotë se procesi zgjedhor është në rrjedhë”, thotë Aleksov.

Njësia zgjedhore numër gjashtë që përfshinë pjesën veriperëndimore të Maqedonisë të banuar me shumicë shqiptare, përmban numrin më të madh të votuesve, ndërkohë që nxjerrë 20 deputetë, aq sa edhe 5 njësitë e tjera zgjedhore.

Njohësit e çështjeve politike thonë se njësia zgjedhore gjashtë, përpos që dëmton forcën e elektoratit shqiptarë duke numëruar 30 mijë votues më shumë sesa njëra nga pesë njësitë e tjera zgjedhore mund të shfrytëzohet për mosnjohjen e zgjedhjeve ose në instancë të fundit dhe anulimin e të njëjtave pas disa nismave të ngritur për këtë çështje në Gjykatën Kushtetuese.

“Çështja e njësisë zgjedhore numër gjashtë do të pastrohet plotësisht kur do të përfundojë dhe afati i dytë për regjistrimin e 31 votuesve të cilët u shlyen si votues të dyshimtë".

"Sipas paralajmërimeve, këta votues të cilët do të duhet të regjistrohen në formë plotësuese, shumica i përkasin njësisë zgjedhore numër gjashtë, pasi të kaloj afati i regjistrimit, do të kemi një pasqyrë më të qartë rreth dallimit mes njësive zgjedhore që tani është rreth dhjetë për qind, e atëherë ky numër mund të jetë shumë më i madh që gjithsesi paraqet shkelje të ligjit sa i përket barazisë së votës”, thekson Albert Musliu nga Instituti për Zhvillimin e Demokracisë.

Pas shlyerjes nga regjistri zgjedhor i mbi 30 mijë votuesve, pjesa më e madhe e të cilëve janë shqiptarë, nga Komisioni Shtetëror i Zgjedhjeve kanë bërë të ditur se nga e premtja sërish vihet në dispozicion lista e votuesve me ç’rast u mundësohet të gjithë atyre që janë fshirë nga kjo listë, të regjistrohen sërish deri më 11 nëntor. (REL)

XS
SM
MD
LG