Ndërlidhjet

Xhavit Haliti flet për prioritetet e Kosovës në MSA dhe kritikon diplomacinë 

  • RFE /RL

Kuvendi i Kosovës

Kuvendi i Kosovës

Komisioni Parlamentar për Stabilizim Asociim ka diskutuar për temat të cilat do të diskutohen me autoritetet e Bashkimit Evropian, në Strasburg, më 23 nëntor.

Kryetari i këtij komisioni, deputeti Xhavit Haliti, tha se temat që Kosova ka interes t'i diskutojë në Strasburg kanë të bëjnë më shumë me aspektet ekonomike.

"Temat më kryesore kanë të bëjnë me ekonominë dhe çështjet që kanë të bëjnë me bisedimet me Serbinë në Bruksel. Këto janë çështjet që duhet të fokusohemi dhe do të fokusohemi, sepse ekonomia është një problem tepër i madh në Kosovë”, tha Haliti.

Tutje, deputeti Haliti ka përmendur edhe pengesat që Serbia i krijon Kosovës në kuadër të përfaqësimit dhe pjesëmarrjes në nismat rajonale e ndërkombëtare.

"Serbia është tepër aktive në të gjitha institucionet ndërkombëtare ku mund ta pengojë Kosovën”, tha Haliti.

Këto pengesa, ai tha se Beogradi i zbaton përmes lobimit, duke veçuar këtu përpjekjet për t’i pamundësuar Kosovës përfaqësimin në Këshillin e Evropës.

“Institucionet e Kosovës duhet të bëjnë më shumë në forcimin e diplomacisë. Mendoj se diplomacia e Kosovës duhet të jetë më shumë e fokusuar në raportet ekonomike me shtete të ndryshme, sesa në takimet e përvjetorëve të pavarësisë së shteteve të ndryshme", tha Haliti.

Ndryshe, më 1 prill ka nisur zbatimi i Marrëveshjes së Stabilizim Asociimit në mes të Kosovës dhe Bashkimit Evropian, e nënshkruar më 27 tetor 2015, në Strasburg dhe e ratifikuar në Kuvendin e Kosovës.

Marrëveshja për Stabilizim Asociim, e cila krijon për herë të parë marrëdhënie kontraktuale me BE-në, është vlerësuar ngjarja më e rëndësishme e Kosovës që nga shpallja e pavarësisë.

Programi Kombëtar për zbatimin e Marrëveshjes së Stabilizim Asociimit me Bashkimin Evropian është miratuar në 10 mars 2016 nga Kuvendi i Republikës së Kosovës.

Ky Program është dokumenti kryesor strategjik kombëtar për zbatimin e agjendës evropiane që mbulon periudhën pesë vjeçare, 2016-2020, dhe fokusohet në tre aspekte strategjike të anëtarësimit në BE: Përmbushjen e detyrimeve të MSA-së; Përafrimin e legjislacionit kombëtar me legjislacionin e BE-së; zbatimin e legjislacionit të përafruar, e të tjera. (REL)

Facebook Forum

XS
SM
MD
LG