Ndërlidhjet

SHBA: Shefi i kompanisë Exxon – favorit për sekretar shteti


Pamje e Shtëpisë së Bardhë në Uashington
Pamje e Shtëpisë së Bardhë në Uashington

Shefi ekzekutiv i kompanisë Exxon Mobil, Rex Tillerson, kompania e të cilit ka interesa të gjëra për shpime në Rusi, është paraqitur si kandidat udhëheqës për tu bërë sekretar i ardhshëm amerikan i shtetit, kanë raportuar mbrëmë mediat në Shtetet e Bashkuara.

Agjencia Reuters dhe e përditshmja, Wall Street Journal, kanë cituar ndihmës të lartë të presidentit të zgjedhur, Donald Trump, që kanë thënë se tash favorizohet Tillerson pasi do të ishte “një kthesë” meqë për të parën herë, do ta sillte përvojën e një ekzekutivi të një korporate në postin më të lartë diplomatik.

Rex Tillerson është bërë i njohur nëpërmjet biznesit të Exxonit me Rusinë në fushën e energjisë, ndërsa presidenti i Rusisë, Vladimir Putin, e ka nderuar atë me medalen e Urdhërit të Miqësisë në vitin 2013, për atë që Kremlini e ka cilësuar si “kontribut të rëndësishëm në forcimin e bashkëpunimit në karburant dhe sektorin e energjisë”.

Derisa janë paraqitur raportet për nominimin e mundshëm të zotit Tillerson, kandidati tjetër për këtë post, Rudolph Giuliani, ka shpallur se tërhiqet nga kjo kandidaturë.

Donald Trump është takuar me Rex Tillersonin më 6 dhjetor dhe ndoshta gjatë fundjavës do të bisedoj përsëri me të, kanë thënë ndihmësit e afërt të zotit Trump.

Por, sipas tyre, derisa Tillerson është tash favorit për postin e sekretarit amerikan të shtetit, edhe kandidatët e tjerë mbesin aktualë, përfshirë të nominuarin republikan për president në vitin 2012, Mitt Romney, ish-ambasadori amerikan në Kombet e Bashkuara, John Bolton, senatori Bob Corker, dhe gjenerali i pensionuar, James Stavridis.

XS
SM
MD
LG