Sekretari amerikan i Shtetit, Rex Tillerson, në emër të presidentit Donald Trump, uroi qytetarët e Kosovës për përvjetorin e nëntë të pavarësisë.
“Shtetet e Bashkuara vlerësojnë miqësinë e fuqishme me Kosovën, të bazuar në aspiratat për stabilitet, paqe dhe begati për të gjithë qytetarët tanë”, tha Tillerson në deklaratën për media, të postuar në ueb-faqen e Departamentit amerikan të Shtetit.
“Përshëndesim përparimin që ka bërë populli i Kosovës në zhvillimin e institucioneve demokratike dhe multietnike gjatë nëntë vjetëve pavarësi”, tha Tillerson.
Ai po ashtu përmendi medaljen e parë olimpike që ka fituar Kosova në vitin 2016 dhe ndeshjen e parë të ekipit futbollistik të Kosovës në FIFA, duke thënë se SHBA “ka qenë e lumtur” t’i shohë këto zhvillime.
“Presim arritje të vazhdueshme të Kosovës derisa ajo punon në forcimin e sundimit të ligjit, në luftën kundër ekstremizmit të dhunshëm dhe ndërton raporte pozitive me fqinjët e saj dhe me gjithë botën”, tha Tillerson.
Ai theksoi se SHBA mbetet e përkushtuar për të ndihmuar Kosovën që të ketë sukses.
“Do të vazhdojmë të punojmë me udhëheqësit dhe njerëzit e saj në ndjekje të paqes dhe begatisë”, tha Tillerson.
Kosova ka shpallur pavarësinë më 17 shkurt të vitit 2008. Atë e kanë njohur 113 vende të botës, në mesin e tyre SHBA-ja dhe shumica e shteteve të Bashkimit Evropian. (v.tela)
Facebook Forum