Delegacioni i NATO-s, i kryesuar nga sekretari i përgjithshëm, Jaap de Hoop Scheffer qëndroi sot për vizitë në Kosovë. Në delegacion ishin përfaqësuesit e Këshillit të NATO-s. Ky delegacion u takua me Ekipin negociator të Kosovës, me zyrtarët e lartë ndërkombëtar dhe me liderë të komunitetit serb në Kosovë. Zoti Scheffer, në konferencën për shtyp tha se ndarja e Kosovës nuk është opsion. Mëtutje, ai konfirmoi qëndrimin e NATO-s në mbështetje të pakos së Martti Ahtisaarit për Kosovën. Ai u shpreh se askush nuk mund të presë zgjidhje shumë të shpejtë për statusin e Kosovës, por nuk do të ketë as vonesa të pa arsyeshme. Ai tha se "NATO-ja dhe KFOR-i janë këtu në këtë periudhë shumë të rëndësishme për Kosovën" dhe shtoi se "askush nuk duhet të mbjellë iluzione se dhuna mund të përdoret për të arritur te zgjidhja".