Zijadin Gashi
Autoritetet ndërkombëtare, civile dhe ushtarake, në Kosovë kanë marrë vendim që të ndalohet futja e pjesëtarëve të formacionit ilegal paraushtarak ‘Garda e Car Llazarit’ në Kosovë, si dhe e formacioneve tjera të ngjashme. Vendimi është nënshkruar nga shefi i UNMIK-ut, Joachim Ruecker, ndërkaq komandanti i KFOR-it, Roland Kather, është zotuar se do ta zbatojë me vendosmëri vendimin. Ai tha se KFOR-i do të jetë nesër në rrugë, për të përcjellë nga afër gjendjen, si dhe do të arrestojë çdo pjesëtar që dyshohet se i përket kësaj organizate. Masat e shtuara të sigurisë janë marrë një ditë pasi që një grup serbësh nga Serbia kanë nisur marshin dhe kanë hyrë tashmë në Kosovë, për të kremtuar nesër 618 vjetorin e Betejës së Kosovës. Pasi që pjesëmarrjen në këtë marsh e ka paralajmëruar edhe formacioni ‘Garda e Car Llazarit’, çka kishte nxitur reagime të ashpra të strukturave të shumta shqiptare në Kosovë, UNMIK-u dhe KFOR-i sot, në një takim trepalësh me kryeministrin, Agim Çeku, prezantuan strategjinë e tyre, për t’u përballur me të priturat dhe të papriturat, që mund të ngjajnë ditën e nesërme. “Sot, unë kam nënshkruar një vendim ekzekutiv, i cili ndalon ‘Gardën e Car Llazarit’ apo ndonjë organizatë të ngjashme paraushtarake, që të zhvillojë çfarëdo aktiviteti në Kosovë, siç është bartja e uniformës që nxit urrejtje apo dhunë etnike”, ka thënë Joachim Ruecker. Bazuar në punën e bërë me KFOR-in, policinë vendore dhe atë ndërkombëtare, Ruecker tha se mund t’i siguronte qytetarët e Kosovës, se nesër, gjendja nuk do të eskalojë në asnjë formë dhe gjithçka do të jetë nën kontrollin e forcave të rendit. Ndërkaq, komandanti i KFOR-it, Roland Kather, tha se ka zhvilluar një aktivitet të ngjeshur këto ditë dhe tha se ishte absolutisht i bindur, që njerëzit e kanë kuptuar porosinë, se dhuna është rrugë e gabuar. ‘Nuk do të lejohet asnjë strukturë paramilitare. Ne do të intervenojmë menjëherë dhe me vendosmëri. Por, duhet bërë të qartë, se unë jam këtu për lirinë e lëvizjes. Prandaj, dua të them, lejoni ata të kalojnë, mos i pengoni, mos i ndaloni’, tha, i vendosur, gjenerali gjerman, Roland Kather. “Ne jemi tërësisht të përgatitur. Do ta kemi tërë KFOR-in në rrugë. Ne do të reagojmë menjëherë, nëse diçka ndodh”, është shprehur gjenerali Kather. Pas këtij takimi trepalësh, kryeministri Agim Çeku tha se besonte, që dita e nesërme do të kalojë e qetë dhe pa incidente. Ai u ka bërë thirrje shqiptarëve dhe, siç tha ai, të gjitha strukturave tjera, që të mos bien në provokime dhe të lejojnë organet e rendit të kryejnë punën e tyre. “Liria e lëvizjes, e fesë janë të garantuara tek ne. Në Kosovë e kemi dhe dëshirojmë ta forcojmë tolerancën ndëretnike dhe ndërfetare. Por, në Kosovë nuk mund të lejohet politizimi i manifestimeve fetare dhe nuk mund të lejohen manifestimet e primitivizmit nacionalist, që i bëjnë disa grupe kriminale dhe paramilitare, që dëshirojnë t’i shfaqin”, ka thënë kryeministri Çeku. Ndërsa u bëri thirrje serbëve që të festojnë nesër qetë, Çeku tha se formacionet si ‘Garda e Car Llazarit’, s’janë tjetër veç mbeturina të regjimit të Millosheviqit. “E ashtuquajtura ‘Garda e Car Llazarit’ apo grupe të tjera, që më shumë janë propagandë, sesa diçka tjera, janë thjeshtë mbeturina, sikur hekuri kur digjet dhe ka vetëm tym, e aspak flakë. Ka shumë të tillë në Serbi, që dëshirojnë destabilizimin e Kosovës, që dëshirojnë që ne, qytetarët e Kosovës, të bimë pre e provokimeve të tilla. Organet e sigurisë do t’i marrin të gjitha masat, që të mos ketë provokime të tilla”, tha kryeministri Çeku. Ndryshe, kremtimi i Betejës së Kosovës dhe paralajmërimi i pjesëmarrjes në këtë organizim edhe i strukturave paraushtarake serbe, vjen në kohën kur edhe ashtu është tërhequr vërejtja për rritjen e pakënaqësive te shumica, për shkak të zvarritjes së zgjidhjes së statusit të Kosovës. Ishte kryeministri Çeku ai, i cili, javën e kaluar, deklaroi se në Kosovë ka krizë besimi në proces, në lidership dhe në bashkësinë ndërkombëtare, pikërisht për shkak të këtyre zvarritjeve.
Autoritetet ndërkombëtare, civile dhe ushtarake, në Kosovë kanë marrë vendim që të ndalohet futja e pjesëtarëve të formacionit ilegal paraushtarak ‘Garda e Car Llazarit’ në Kosovë, si dhe e formacioneve tjera të ngjashme. Vendimi është nënshkruar nga shefi i UNMIK-ut, Joachim Ruecker, ndërkaq komandanti i KFOR-it, Roland Kather, është zotuar se do ta zbatojë me vendosmëri vendimin. Ai tha se KFOR-i do të jetë nesër në rrugë, për të përcjellë nga afër gjendjen, si dhe do të arrestojë çdo pjesëtar që dyshohet se i përket kësaj organizate. Masat e shtuara të sigurisë janë marrë një ditë pasi që një grup serbësh nga Serbia kanë nisur marshin dhe kanë hyrë tashmë në Kosovë, për të kremtuar nesër 618 vjetorin e Betejës së Kosovës. Pasi që pjesëmarrjen në këtë marsh e ka paralajmëruar edhe formacioni ‘Garda e Car Llazarit’, çka kishte nxitur reagime të ashpra të strukturave të shumta shqiptare në Kosovë, UNMIK-u dhe KFOR-i sot, në një takim trepalësh me kryeministrin, Agim Çeku, prezantuan strategjinë e tyre, për t’u përballur me të priturat dhe të papriturat, që mund të ngjajnë ditën e nesërme. “Sot, unë kam nënshkruar një vendim ekzekutiv, i cili ndalon ‘Gardën e Car Llazarit’ apo ndonjë organizatë të ngjashme paraushtarake, që të zhvillojë çfarëdo aktiviteti në Kosovë, siç është bartja e uniformës që nxit urrejtje apo dhunë etnike”, ka thënë Joachim Ruecker. Bazuar në punën e bërë me KFOR-in, policinë vendore dhe atë ndërkombëtare, Ruecker tha se mund t’i siguronte qytetarët e Kosovës, se nesër, gjendja nuk do të eskalojë në asnjë formë dhe gjithçka do të jetë nën kontrollin e forcave të rendit. Ndërkaq, komandanti i KFOR-it, Roland Kather, tha se ka zhvilluar një aktivitet të ngjeshur këto ditë dhe tha se ishte absolutisht i bindur, që njerëzit e kanë kuptuar porosinë, se dhuna është rrugë e gabuar. ‘Nuk do të lejohet asnjë strukturë paramilitare. Ne do të intervenojmë menjëherë dhe me vendosmëri. Por, duhet bërë të qartë, se unë jam këtu për lirinë e lëvizjes. Prandaj, dua të them, lejoni ata të kalojnë, mos i pengoni, mos i ndaloni’, tha, i vendosur, gjenerali gjerman, Roland Kather. “Ne jemi tërësisht të përgatitur. Do ta kemi tërë KFOR-in në rrugë. Ne do të reagojmë menjëherë, nëse diçka ndodh”, është shprehur gjenerali Kather. Pas këtij takimi trepalësh, kryeministri Agim Çeku tha se besonte, që dita e nesërme do të kalojë e qetë dhe pa incidente. Ai u ka bërë thirrje shqiptarëve dhe, siç tha ai, të gjitha strukturave tjera, që të mos bien në provokime dhe të lejojnë organet e rendit të kryejnë punën e tyre. “Liria e lëvizjes, e fesë janë të garantuara tek ne. Në Kosovë e kemi dhe dëshirojmë ta forcojmë tolerancën ndëretnike dhe ndërfetare. Por, në Kosovë nuk mund të lejohet politizimi i manifestimeve fetare dhe nuk mund të lejohen manifestimet e primitivizmit nacionalist, që i bëjnë disa grupe kriminale dhe paramilitare, që dëshirojnë t’i shfaqin”, ka thënë kryeministri Çeku. Ndërsa u bëri thirrje serbëve që të festojnë nesër qetë, Çeku tha se formacionet si ‘Garda e Car Llazarit’, s’janë tjetër veç mbeturina të regjimit të Millosheviqit. “E ashtuquajtura ‘Garda e Car Llazarit’ apo grupe të tjera, që më shumë janë propagandë, sesa diçka tjera, janë thjeshtë mbeturina, sikur hekuri kur digjet dhe ka vetëm tym, e aspak flakë. Ka shumë të tillë në Serbi, që dëshirojnë destabilizimin e Kosovës, që dëshirojnë që ne, qytetarët e Kosovës, të bimë pre e provokimeve të tilla. Organet e sigurisë do t’i marrin të gjitha masat, që të mos ketë provokime të tilla”, tha kryeministri Çeku. Ndryshe, kremtimi i Betejës së Kosovës dhe paralajmërimi i pjesëmarrjes në këtë organizim edhe i strukturave paraushtarake serbe, vjen në kohën kur edhe ashtu është tërhequr vërejtja për rritjen e pakënaqësive te shumica, për shkak të zvarritjes së zgjidhjes së statusit të Kosovës. Ishte kryeministri Çeku ai, i cili, javën e kaluar, deklaroi se në Kosovë ka krizë besimi në proces, në lidership dhe në bashkësinë ndërkombëtare, pikërisht për shkak të këtyre zvarritjeve.
