Kryeministri i Shqipërisë, Sali Berisha thekson se opsioni i ndarjes së Kosovës, që u komentua këto ditë, "paraqet kërcënim në themel për paqen dhe stabilitetin në Kosovë dhe më gjërë". Drejtori për marrëdhënie me shtypin, Gridi Rroji mëtutje njoftoi se kryeministri ka thënë se "opsioni i ndarjes bie në kundërshtim të hapur me të gjitha përcaktimet e derisotme ndërkombëtare për zgjidhjen e statusit të Kosovës". Zoti Berisha tha se "ndarjet e reja në Ballkan, me motivin e shteteve të pastra etnike do ta hapnin spiralen e një krize të konflikteve të rrezikshme jo vetëm për gadishullin ballkanik por edhe për Evropën".
