Forcat kurde në veri të Irakut kanë zmbrapsur militantët e Shtetit Islamik (IS) nga qyteti Zumar dhe disa fshatra pranë.
Gjenerali Karim Atuti ka thënë se forcat e armatosura kurde, me mbështetjen ajrore të Shteteve të Bashkuara, kanë dëbuar militantët nga qendra e Zumarit.
Zumari, i cili ndodhet rreth 60 kilometra në veriperëndim të Mosulit, ka qenë njëri nga qytetet e para kurde që është kapur nga militantët e Shtetit Islamik në muajin gusht.
Në Uashington, Pentagoni ka bërë të ditur se koalicioni ushtarak, i udhëhequr nga SHBA-ja, ka kryer sulme të reja kundër pozicioneve militante në Irak dhe Siri.