Në Francë dhe në vendet e tjera të Evropës, sot në mesditë është mbajtur një minutë heshtje për viktimat e sulmit terrorist më vdekjeprurës në Francë.
Në Paris, presidenti i Francës, Francois Hollande, dhe kabineti i tij, të gjithë të veshur në të zeza, i bashkuan duart në Universitetin Sorbona, së bashku me studentët.
Në Sheshin e Republikës në Paris, afër vendit të sulmit të së premtes, qindra vetë janë ndalur për t’i përkujtuar të 132 njerëzit e vrarë.
Në samitin G20 në Turqi, shtatë zyrtarë të lartë evropianë – David Cameron, Angela Merkel, Matteo Renzi, Mariano Rajoy, Laurent Fabius, Donald Tusk dhe Jean-Claude Juncker, kanë mbajtur një minutë heshtje para hyrjes kryesore të ndërtesës ku mbahet samiti.
Një minutë heshtje është mbajtur edhe në shumë vende, përfshirë Belgjikën, Britaninë e të tjera.
Me një minutë heshtje për viktimat e sulmeve në Paris ka filluar edhe mbledhja e Kryesisë së Kuvendit të Kosovës.