Një komision i Kombeve të Bashkuara, që ka zhvilluar hetime për krime të luftës në Siri, thotë se qeveria e presidentit, Bashar al-Assad, e ka kryer pjesën më të madhe të mizorive në këtë vend të përfshirë nga lufta.
Ky komision thotë se më shumë njerëz kanë vrarë forcat qeveritare se sa militantët e Shtetit Islamik.
Shefi i komisionit të OKB-së, Paulo Sergio Pinheiro, ka raportuar sot në Këshillin për të drejtat e njeriut të Kombeve të Bashkuara në Gjenevë, se qeveria e Sirisë mbetet përgjegjëse për pjesën më të madhe të të vrarëve në këtë konflikt.
Sipas Kombeve të Bashkuara , prej marsit të vitit 2011, kur ka filluar konflikti, janë vrarë më se 190 mijë njerëz.
Duke u shprehur për militantët e Shtetit Islamik, zoti Pinheiro i ka përshkruar ata si “agjentë të vdekjes dhe të shkatërrimit”.
