Raportet KFOR-FSK, të paqarta
Pjesëtarë të FSK-së
Përditësimi i fundit: 08.03.2010 18:12
Ministria e Forcës së Sigurisë së Kosovës tha se mosmarrëveshja me KFOR-in, lidhur me pjesëmarrjen e Gardës së FSK-së në manifestimin e Epopesë së UÇK-së, është tejkaluar. KFOR-i nuk komenton deklaratën e FSK-së.
Raportet mes KFOR-it dhe FSK-së nuk janë qartësuar plotësisht. Ndërsa Forca e Sigurisë së Kosovës thotë se mosmarrëveshja me KFOR-in është tejkaluar, misioni ndërkombëtar ushtarak nuk e pohon këtë, por thotë se janë duke zhvilluar diskutime në nivele të ndryshme për të kapërcyer situatën.
Dy ditë më parë, komandanti i KFOR-it, Markus Bentler, ngriu raportet me FSK-në, për shkak se Garda e armatosur e FSK-së mori pjesë në manifestimin Epopeja e UÇK-së. Sipas KFOR-it, kjo nuk ka përkuar me statusin joushtarak të FSK-së.
“KFOR-i nuk e komenton deklaratën që është lëshuar sot nga FSK-ja. Ne jemi duke zhvilluar bisedime në nivele të ndryshme, në përpjekje për të zgjidhur çështjen. Jemi optimistë se do të kemi zgjidhje të mirë në të ardhmen”, i tha Radios Evropa e Lirë, zëdhënësi i KFOR-it, Hans Peter Buh.
Në anën tjetër, në një komunikatë për media, Ministria e Forcës së Sigurisë së Kosovës thotë se e "çmon bashkëpunimin me KFOR-in dhe NATO-n si të domosdoshëm për paqen dhe stabilitetin në Kosovë dhe rajon".
Në komunikatë thuhet se bashkëpunimi me KFOR-in e NATO-n në ngritjen e kapaciteteve të FSK-së, është i shkëlqyeshëm.
"Çështjen e diskutuar në lidhje me pjesëmarrjen legjitime të Gardës së FSK-së në manifestimin e Epopesë së UÇK-së, tanimë e vlerësojmë të tejkaluar", thuhet në komunikatë.
Por, zëdhënësi i KFOR-it, Hans Peter Buh, pohoi se gjërat nuk janë siç kanë qenë para 5 marsit, kur edhe u paraqit Garda e FSK-së në ceremoninë për Epopenë e UÇK-së.
“Kjo është e vërtetë. Por, ne jemi duke biseduar dhe duke u përpjekur që ta zgjidhim çështjen”, tha Buh.
KFOR-i është në pritje të sqarimit nga ana e autoriteteve të Kosovës të, siç e ka quajtur, incidentit të së premtes. KFOR-i ka kërkuar veprime korrigjuese, si dhe garanci se veprime të tilla nuk do përsëriten.
Në prononcimet e mëhershme të ditës së sotme, zyrtarët e FSK-së kanë thënë se kjo forcë nuk ka shkaktuar asnjë incident. Zëdhënësi i FSK-së, Ibrahim Shala, u shpreh:
“Paraqitja e Gardës Ceremoniale në ceremoninë e Epopesë së UÇK-së nuk ishte incident, sepse pjesëmarrja e FSK-së ka qenë që në këshillin organizativ të ceremonisë. Kjo ceremoni kishte karakter shtetëror, sepse mbahej nën patronatin e kryeministrit dhe Qeverisë”.
“FSK-ja i është përmbajtur një agjende qeveritare. Kudo, në pritje të saj, Garda Ceremoniale shkon edhe me armët e veta. Në formacion të tillë ajo ka pritur shumë ministra, ka pritur presidentë dhe personalitete të larta ushtarake”, tha Shala.
Por, KFOR-i ka pohuar të kundërtën, ndërkaq ka kritikuar edhe praninë e flamurit të NATO-s gjatë ceremonisë, duke thënë se “kjo nuk është e pranueshme për atë se KFOR-i është neutral ndaj statusit”.
Vendimi për pezullimin e përkrahjes, mentorimit dhe trajnimit të Forcës së Sigurisë së Kosovës është marrë nga komandanti i KFOR-it. Nuk është saktësuar ndonjë afat pezullimi.
Partia opozitare, Aleanca për Ardhmërinë e Kosovës, i ka sugjeruar kryeministrit të Kosovës dhe ministrit të Forcës së Sigurisë së Kosovës të adresojnë kërkim-falje ndaj NATO-s për keqkuptimet e krijuara ditëve të fundit.
“AAK-ja kërkon nga liderët e institucioneve të vendit që të punojnë seriozisht në ruajtjen dhe zhvillimin e besimit me NATO-n, në ndërtimin dhe zhvillimin e vendit dhe popullit të Kosovës”, thuhet në një komunikatë për media të kësaj partie.
Në anën tjetër, eksperti për çështje ushtarake, Ramadan Qehaja, tha se udhëheqësit e vendit duhet sa më parë të ulen dhe të bisedojnë me komandantin e KFOR-it, apo edhe me vetë sekretarin e përgjithshëm të NATO-s për daljen nga kjo situatë.
“Ne, këtë situatë duhet ta tejkalojmë, duhet urgjentisht të ulemi me komandantin e KFOR-it - udhëheqja jonë, presidenti, kryeministri... Nëse ka nevojë, edhe me zotin Rasmusen të bëhet një bisedë dhe t’i shpjegojnë gjërat se si kanë ecur”.
“Ne nuk jemi të interesuar që t’i prishim marrëdhëniet me NATO-n assesi, sepse jemi të varur prej tyre dhe duhet të jemi falënderues për kontributin që kanë dhënë për formësimin e FSK-së”, theksoi Qehaja.
Plani i Ahtisarit, në bazë të të cilit është shpallur pavarësia e Kosovës, parasheh që NATO-ja të ketë autoritet ekzekutiv ndaj FSK-së, derisa ajo të arrijë kapacitetin e plotë operacional.