E martë, korrik 29, 2014 Kosova 04:33

Ekonomi

Zbutja e varfërisë - kush ka plane konkrete?

Pamje në Prishtinë...
Pamje në Prishtinë...
Subjektet opozitare në Kosovë thonë se ka mundësi dhe forma që shkalla e varfërisë në vend të zvogëlohet. Këto parti kohëve të fundit, përmes konferencave dhe komunikatave për media kanë kritikuar Qeverinë për gjendjen e rëndë sociale në vend, sidomos për rritjen e numrit të të varfërve.

Por, a kanë plane konkrete partitë opozitare, për zbutjen e shkallës së varfërisë?

Zyrtarë nga Lidhja Demokratike e Kosovës, thonë se në programin e tyre ka politika dhe masa për përmirësimin e gjendjes sociale. Abdullah Hoti, nga kjo parti, shprehet se mundësitë janë te subvencionimi i bujqësisë,  pasi, sipas tij, numri më i madh i të varfërve, jeton në vendet rurale. Ai, madje, thotë se edhe korniza ligjore më tepër favorizon se sa që lufton varfërinë.

“Nëse shihen karakteristikat e atyre familjeve dhe individëve që janë të varfër, ata janë kryesisht të përqendruar në zonat rurale dhe disa urbane, të cilat janë të papunë dhe me arsim të ulët. Prandaj, edhe politikat që tentojnë të zbusin papunësinë, duhet të drejtohen kah këta individë që t’i përmbushin kërkesat e tyre”.

“Në programin tonë ne kemi paraparë një varg masash që fuqizojnë njëra- tjetrën, p.sh. subvencionimin e bujqësisë. Por, jo subvencionimi i të mbjellave, por subvencionim të produkteve të gatshme që bujqit nxjerrin në treg”,
thotë Hoti.

Ndërkaq, përfaqësues të Lëvizjes Vetëvendosje, thonë se varfëria në Kosovë mund të ulet vetëm me rritjen e numrit të të punësuarve, sepse, sipas tyre, varfëria nuk luftohet me asistencë sociale.

Shpend Ahmeti, nga kjo lëvizje, vlerëson se përmes politikave të gabuara, ekzekutivi ka bërë që të thellohet më tepër varfëria në vend.

“Ne vazhdojmë të importojmë sasi të mëdha të produkteve bujqësore, ndërsa 50 për qind e tokës sonë nuk punohet. Prandaj, në vend që të mendojmë për privatizimin e PTK-së dhe të ndërtojmë autostrada dhe asfalt, Qeveria duhet të mendojë për lehtësime për ata që investojnë dhe krijojnë vende të punës në Kosovë dhe për investime dhe lehtësime për ata që dëshirojnë ta punojnë tokën”, konsideron Ahmeti. 

Edhe Aleanca për Ardhmërinë e Kosovës ka programin e vet që mundëson uljen e varfërisë dhe rritjen e numrit të të punësuarve, thotë Haki Shatri, nga kjo parti.
Sipas Shatrit shkalla e lartë e varfërisë, nuk lejon që për një periudhë të shkurtër kohore të zgjidhet ky problemi.

Eliminim i dukurive negative, evazionin fiskal, krijimi i një ambienti më të mirë për biznes dhe investuesit e huaj, sipas tij, mundësojnë përmirësimin  e gjendjes sociale. 

“Vazhdimisht,  Kosova po shkon duke u fundosur në këtë pjesën e varfërisë dhe papunësisë. Dhe, çdo tentim për të përmirësuar situatën, do të marrë kohë, relativisht të gjatë . Nuk do të mund të bëhet kjo për një vit ose me shkop magjik, vetëm të ndërrohet pushteti dhe rregullohen gjërat”.

“Duhet të fillohet prej baze, të krijohen kushte, të fillohet me ringjallje ekonomike, një fillim i zvogëlimit të papunësisë dhe në kombinim me tërheqje të investitorëve të huaj, do të mund të arrihet, ndoshta për një periudhë pesë vjeçare”
, vlerëson Shatri.

Sidoqoftë, përfaqësues të opozitës shprehen se kosovarët janë në të kërcënuar nga varfëria dhe është e domosdoshme të ndërmerren politika sociale.       

Sipas vlerësimeve të Bankës Botërore, thuhet se varfëria në Kosovë është 34 për qind e gjithë popullsisë.

Sipas këtij raporti, pak më shumë se një e treta e popullsisë jetonin nën vijën e varfërisë absolute me 1.55 euro në ditë, ndërsa 12 për qind jetonin nën vijën e varfërisë së skajshme me 1.02 euro.

Nadie Ahmeti

nadie.ahmeti+gmail.com

Me profesionin e gazetarisë ka filluar të merret që prej vitit 2000, kurse Radios Evropa e Lirë i është bashkuar në vitin 2001. Kryesisht mbulon çështjet ekonomike dhe sociale, për çka edhe i janë ndarë disa mirënjohje.
Ky forum është mbyllur
Komentet
     
Nuk ka komente në këtë forum