E premte, maj 22, 2015 Kosova 22:38

WP: John Kerry - i përshtatshëm për sekretar të shtetit

John Kerry
John Kerry

Artikujt e ndërlidhur

Obama: Kerry gëzon respekt në mbarë botën

Presidenti amerikan, Barack Obama, deklaroi se i nominuari i tij për sekretar të ardhshëm të Shtetit, senatori John Kerry, është një personalitet, që ka fituar respektin e liderëve në mbarë botën.
Duke e nominuar senatorin John Kerry, për sekretar amerikan të shtetit, presidenti Obama ka vlerësuar se “në një mënyrë, e tërë jeta e John-it e ka përgatitur atë për këtë rol”, shkruan në fillim të editorialit të saj e përditshmja Washington Post, në numrin e sotëm.

Zoti Kerry, veteran i dekoruar i Vietnamit, ka qenë aktiv në çështjet e jashtme prej ardhjes së tij në Senat, në vitin 1985.

John Kerry, një avokat i vazhdueshëm i rolit të liderit të Shteteve të Bashkuara, ka krijuar lidhje personale me politikanët më të lartë në shumë shtete.

Me gjithë dështimin e tij në zgjedhjet presidenciale në vitin 2004, fushata e atëhershme e ka bërë atë me më tepër përvojë në menaxhimin e organizatës më të madhe dhe sfidat e saj të përditshme.

Ajo që është më e rëndësishme, është se zoti Kerry tashmë ka punuar si përfaqësues diskret dhe i aftë për zotin Obama, gjatë mandatit të tij të parë, shkruan Washington Post.

Derisa ka shërbyer si kryesues i Komitetit për Marrëdhënie të Jashtme të Senatit, demokrati 69 vjeçar nga Masaçusetsi, ka udhëtuar për në Afganistan, Pakistan, Egjipt dhe Sudan - i përmendëm vetëm disa nga vendet që ai i vizitoi - për t’i avancuar synimet e Shteteve të Bashkuara.

Ai ka ndihmuar në ndërmjetësimin e marrëveshjeve; në kohën kur presidenti i Afganistanit, Hamid Karzai, kishte mospajtime me disa zyrtarë të lartë të administratës, zoti Kerry e bindi atë që ta pranoj balotazhin në zgjedhjet e presidentit.

Zoti Kerry, shkruan e përditshmja Washington Post, beson shumë në vizitonin e Bill Clintonit për Shtetet e Bashkuara si “një vend esencial”.

Në këtë kuadër, ai e ka shtyrë zotin Obama, që është më i kujdesshëm, drejt dy vendimeve, të cilat janë dy ndër vendimet më të rëndësishme, në politikën e jashtme: intervenimin në Libi dhe mbështetjen për largimin e Hosni Mubarakut nga presidenca e Egjiptit.

Kerry ka luajtur, po ashtu, rol në njërin nga sukseset më të theksuara – në ratifikimin në Senat të marrëveshjes së re të armatimit bërthamor me Rusinë.

Duke e prekur njërin nga raportet më të vështira të Shteteve të Bashkuara, me Pakistanin, zoti Kerry ishte avokat i strategjisë afatgjatë të promovimit të zhvillimit ekonomik, për ta balancuar bashkëpunimin afatshkurtër ushtarak, shkruan Washington Post.

Si sekretar i shtetit, zoti Kerry do ta gjej vetveten më së shpeshti duke i kryer politikat e farkëtuara në Shtëpinë e Bardhë, e jo në implementimin e vizionit të tij. Senatori është i njohur për bindjen e tij se Shtetet e Bashkuara duhet të bëjnë më tepër për ndërmjetësimin e një marrëveshjeje ndërmjet izraelitëve dhe palestinezëve, por ky qëllim i vlefshëm duket më i largët se kurrë, derisa personat e linjës së fortë në të dy anët, e marrin pushtetin.

Fokus më i mirë për sekretarin e ardhshëm të shtetit, do të ishte që të përpiqet ta formoj drejtimin e Lindjes së Mesme Arabe turbulente, duke filluar me Sirinë, ku lidershipi i Shteteve të Bashkuara fatkeqësisht ka munguar, shkruan Washington Post.

Zoti Kerry e ka një dobësi të madhe, e cila është e njëjtë me atë të Obamës: një besim të tepruar në përfitimet potenciale të “angazhimit” me regjimet e papërgjegjshme dhe diktatorët.

Në veçanti, përpjekjet e përsëritura të zotit Kerry, për të nxitur një dialog me sunduesin e Sirisë, Bashar al-Assad, ofron një rast të studimit se si një diplomaci e tillë mund të shkoj gabimisht. Assadi cinik e kishte bindur Kerryn se ai është “reformues”, që synon paqe me Izraelin, konkluzion që, siç kanë treguar 18 muajt e kaluar, nuk ka mundur të jetë më i gabueshëm, vlerëson Washington Post në editorialin e vet.

Dedikimi i zotit Kerry për dialog, bile edhe me armiqtë e Shteteve të Bashkuara, deri-diku mund të kuptohet për sekretarin e shtetit. Por, kabineti i ri i presidentit Obama, po ashtu, do të përfitonte nga balanci i realizuar në mandatin e parë, nga personalitetet siç ishin Hillary Clinton dhe Robert M. Gates, të cilët kishin pasur pikëpamje më skeptike për “angazhimin” dhe ishin në favor të hapave të tillë, siç ishte shtimi i trupave në Afganistan.

Konfirmimi i zotit Kerry për sekretar të shtetit, do të ishte një e arritur e rrallë për kandidatin presidencial që kishte humbur. Kjo është diçka që ai e ka fituar dhe ne presim që ai vendit do t’i shërbej fare mirë, shkruan në fund të editorialit të vet, e përditshmja Washington Post. 

Përgatiti: Fatmir Bujupi

Përzgjedhja Jonë

Për një vit, priten një milion metra kub pyje

Kosova ka 460 mijë hektarë pyje. Rreth 80 për qind e lëndëve djegëse në vend kanë burim pyjet. Andaj, ekspertët thonë se pyjet në Kosovë nuk janë në nivel të kënaqshëm, derisa shtojnë se gjatë një viti priten rreth një million metra kub pyje.

Një milion euro për shëndetësi në veri

Qeveria e Kosovës ka ndarë 15 milionë euro për katër komunat në veri të Kosovës, Mitrovicën e Veriut, Leposaviqin, Zubin Potokun dhe Zveçanin. Për sektorin e shëndetësisë janë ndarë 1 milion euro.

Si të vazhdosh jetën kur miqtë të martirizohen?

“Një nga gjërat më të vështira të xhihadit është kur e humbet një mik”, e pranon militanti çeçen i Shtetit Islamik, Musa Abu Yusuf Shishani, në një postim në rrjete sociale të publikuar së fundi.