E dielë, maj 24, 2015 Kosova 15:09

Bota

Zhvillime fascinuese në shkencë e teknologji

Curiosity
Curiosity
Gjatë vitit 2012, në fushën e shkencës dhe teknologjisë, ka pasur zhvillimet fascinuese.

Nga sipërfaqja e Marsit e deri te pikat më të thella në Tokë, dhe shkëlqimi nga të reshurat e jashtëzakonshme në malet e Guinesë së Re, pra tri zhvillimet kryesore të këtij viti në shkencë dhe teknologji, kanë lindur në vende të ndryshme.

Por, ajo që është e përbashkët te të gjitha këto zhvillime, është mënyra se si ato i inspiruan dhe i befasuan si shkencëtarët kërkues, ashtu edhe pjesën më të madhe të publikut.


"Curiosity"

Pas më tepër se 8 muaj udhëtim, sonda “Curiosity” e Administratës së Gjithësisë e Aeronautikës Kombëtare të Shteteve të Bashkuara, e njohur me shkurtesën NASA, në gusht të vitit 2012, e bëri njërin nga aterrimet më të komplikuara, jo vetëm në sipërfaqen e Marsit.

E mbushur me pajisje dhe instrumente më të avancuara teknike për kërkime lidhur me mundësinë e ekzistimit të jetës, roboti shkencor me gjashtë rrota nuk dështoi.

“Curiosity” ishte lajm kryesor në muajin shtator kur analizat e rërës i çuan shkencëtarët të konkludojnë se uji, përbërësi kryesor për jetë, njëherë kishte rrjedhur në këtë planet.

Anëtarja e ekipit shkencor të sondës “Curiosity”, Rebecca Williams, ishte ajo që e bëri shpalljen historike.

“Këta gurë që ne po i shohim këtu, me formë të rrumbullakët, ato copëza janë shumë të mëdha që të barten nga era. Konsensusi i ekipit shkencor është se këta janë gurë, që janë transportuar me ujë, me një rrjedhje të fuqishme”, tha Rebecca Williams.


“Grimca e Zotit”

Por, konkurruese e tregimit për sondën "Curiosity" për titullin e ngjarjes kryesore shkencore e teknologjike  në vitin 2012, ishte informacioni dramatik për fizikanët, që me gjasë e kishin zbuluar ekzistencën e të ashtuquajturit “Higgs Boson”, që është një grimcë misterioze, e cila mund ta shpjegoj teorinë se si materia e arrin masën e saj.

Joe Incandela ka bërë hulumtime për këtë grimcë, e cila ndër shkencëtarë është e njohur edhe si “Grimca e Zotit”, në Organizatën Evropiane për Kërkime Bërthamore (CERN) në Zvicër. Ky ishte një program i jashtëzakonshëm me vlerë 10 miliardë dollarë.

Shkencëtari Incandela u tha gazetarëve në muajin korrik se ai dhe kolegët e tij kishin “arritur në brendi të strukturës së universit”.

“Kemi të bëjmë me atë se në këto lloj eksperimentesh, ne i kërkojmë grimcat më të rralla, që janë bërë ndonjëherë. Prandaj, duhet ta keni parasysh se ky është një rezultat shumë preliminar, por ne mendojmë se është shumë i fuqishëm. Është tejet solid, përndryshe, nuk do ta kishim paraqitur”, tha Joe Incandela.

Shqyrtimet e mëpastajme të të dhënave i kanë konfirmuar gjetjet dhe kanë çuar kah prova për grimcën në Modelin Standard të fizikës.

Nëse ndodh që e ashtuquajtura “Higg Boson” nuk është grimca që mund të ndihmojë në zbulimin e ekzistencës së materies së fshehtë, megjithatë ky zhvillim është përshkruar si njëri nga më të mëdhenjtë në fushën e fizikës, në shekullin e fundit.
 

"Big Bang"

Një tjetër zhvillim i nxehtë ndodhi kur shkencëtarët në Laboratorin Kombëtar “Brookhaven” në Shtetet e Bashkuara, e prodhuan temperaturën më të lartë që ndonjëherë e ka krijuar njeriu – duke arritur temperaturën e jashtëzakonshme prej 4 mijë miliardë shkallësh Celsius.

Kjo temperaturë, që është 250 mijë herë më e lartë se ajo në sipërfaqen e Diellit, zgjati vetëm një pjesë të sekondës, pasi shkencëtarët së bashku i shkatërruan jonet e arta gjatë kërkimeve në kuadër të të ashtuquajturit Big Bang (eksplodimi, për të cilin disa shkencëtarë sugjerojnë se e ka krijuar universin).

Bretkosa Paedophryne Amauensis 

Por, shumë larg nga laboratori, shkencëtarët në vitin 2012, po ashtu e kanë konfirmuar zbulimin e kurrizorit më të vogël të njohur, që është një lloj i bretkosës që jeton në malet e Guinesë së Re.

Bretkosa me emrin latin Paedophryne Amauensis është e gjatë vetëm 7.7 milimetra. (f. b.)
Ky forum është mbyllur
Komentet
     
Nuk ka komente në këtë forum

Përzgjedhja Jonë

Si të vazhdosh jetën kur miqtë të martirizohen?

“Një nga gjërat më të vështira të xhihadit është kur e humbet një mik”, e pranon militanti çeçen i Shtetit Islamik, Musa Abu Yusuf Shishani, në një postim në rrjete sociale të publikuar së fundi.