Ndërlidhjet

Kuvendi sot sërish përballet me themelimin e Gjykatës Speciale


Kuvendi i Kosovës pritet të nxjerrë sot për miratim amandamentet kushtetuese të propozuara nga qeveria, me të cilat i hapet rruga ligjore themelimit të Gjykatës Speciale për Krime Lufte.

Kjo do të jetë hera e dytë që Kuvendi procedon me këto ndryshime, pasi që më 29 maj, me kërkesë të Partisë Demokratike të Kosovës kishte vendosur që të shtyjë votimin për një seancë tjetër.

Për miratimin e këtyre amendamenteve, janë të nevojshme votat e dy të tretave të të gjithë deputetëve si dhe dy të tretat e votave të deputetëve nga radhët e minoriteteve.

Opozita tashmë është pozicionuar kundër themelimit të kësaj gjykate. Kështu që koalicioni qeverisës i Partisë Demokratike të Kosovës dhe Lidhjes Demokratike të Kosovës, mbetet që t’i siguroj vet 80 votat e shumicës dhe 14 votat e deputetëve nga radhët e komuniteteve pakicë për t’i bërë ndryshimet e nevojshme kushtetuese.

Gjykata Speciale, nëse themelohet, do të hetojë dyshimet e supozuara në raportin e Këshillit të Evropës lidhur me pretendimet e senatorit zviceran Dick Marty, për trafik organesh të disa civilëve serbë nga ana e disa ish-pjesëtarëve të Ushtrisë Çlirimtare të Kosovës të cilat më pas u hetuan për tre vjet rresht nga një Task Forcë speciale ndërkombëtare e udhëhequr nga prokurori amerikan, Clint Williamson.

Hetimet përfshijnë periudhën e viteve 1998 dhe gjashtë mujorin e parë të viti 2000, ku rastet nuk do të përkufizohen vetëm me trafik organesh, por edhe me dyshimet për krime tjera të luftës.

Selia e Gjykatës Speciale për Krime Lufte pritet të jetë jashtë Kosovës, ku si vend potencial është përmendur Holanda. Kurse në përbërjen e saj do të ketë prokurorë e gjykatës ndërkombëtarë.

Krahas amandamenteve kushtetuese, nëse ato miratohen, pritet që më pas të procedohet për miratim edhe Projektligji për dhomat e specializuara dhe zyrën e prokurorit të specializuar, i hartuar në negociatat mes përfaqësuesve të institucioneve të Kosovës dhe Bashkimit Evropian.

Dhomat e specializuara dhe zyra e prokurorit të specializuar do të jenë nën udhëheqjen ndërkombëtare.

Po ashtu, qeveria ka hartuar edhe një Projektligj me të cilin ofron mbrojtje juridike dhe kompensim financiar personave që do të akuzohen nga gjykata speciale.

Por, ky projektligj po has edhe në mospajtime pasi që deputetë dhe pjesëtar të shoqërisë civile pretendojnë se nuk është e drejtë që për rastet individuale të akuzuarve të shpenzohet buxheti i Kosovës, pasi që një praktikë e tillë nuk është aplikuar as në rastet e gjykimeve të Tribunalit të Hagës.

Themelimi i Gjykatës Speciale mbetet i varur nga sigurimi i 80 votave të deputetëve nga radhët e koalicionit qeverisës.

Në rast të dështimit të themelimit të kësaj gjykate nga Kuvendi i Kosovës, bazuar në deklaratat e disa përfaqësuesve ndërkombëtar, çështja më pas do të mund të kalonte në Këshillin e Sigurimit të Kombeve të Bashkuara, ku thuhet se kjo gjykatë do të themelohej mbi bazën e Rezolutës 12 44.

XS
SM
MD
LG