Hetuesit në Rusi kanë rritur seriozitetin e akuzave kundër pilotes ukrainase, Nadia Savchenko, duke e akuzuar atë për pjesëmarrje të drejtpërdrejtë në vrasjen e dy gazetarëve rusë, të cilët kanë vdekur vitin e kaluar, derisa kanë qenë duke mbuluar konfliktin në Ukrainë.
Vladimir Markin, zëdhënës i Komitetit Hetues të Rusisë, i ka bërë publike akuzat e reja, që përfshijnë ato për tentim-vrasje dhe për hyrje ilegale në territorin rus.
Savchenko ndodhet në paraburgim në Rusi qysh në korrik të vitit 2014, kur thotë se është rrëmbyer nga separatistët pro-rusë në lindje të Ukrainës dhe është dërguar përtej kufirit në Rusi.
Akuzat kundër Savchenkos mund të bartin dënim të përjetshëm.
Më herët, autoritetet ruse e kanë akuzuar atë për pjesëmarrje në vrasjen e gazetarëve Igor Kornelyuk dhe Anton Voloshin në Luhansk.
Savchenko i ka hedhur vazhdimisht poshtë akuzat, duke thënë se Rusia nuk ka të drejtë ta ndalojë ose gjykojë atë.
Kievi dhe qeveritë perëndimore kanë kërkuar nga Rusia lirimin e menjëhershëm të saj.
