Prokuroria Themelore në Prishtinë ka njoftuar se ka ngritur aktakuzë kundër personit T.G., për veprën penale “dhunë ndaj përfaqësuesve të lartët ë Republikës së Kosovës në tentativë” dhe për “pengim të personit zyrtar gjatë kryerjes së detyrës zyrtare”.
Mëtutje në njoftimin për media, prokuroria shpjegon se aktakuza ka të bëjë me “rrezikimin e përfaqësuesve të lartë të Republikës së Kosovës, gjegjësisht eksortës së kryeministrit, ku i pandehuri, sipas marrëveshjes paraprake me katër persona të paidentifikuar në rrugën Ilir Konushevci në Prishtinë, me disa mjete të përshtatshme për shkatërrimin e gomave të punuara nga metali me gjemba, kanë tentuar t’i shkatërrojnë gomat e veturave të eskortës, mirëpo janë penguar nga personat zyrtarë”.
Në kumtesë theksohet se “gjatë veprimeve të pjesëtarëve të policisë, i pandehuri i ka sulmuar ata duke iu shkaktuar lëndime trupore” dhe se “pas kësaj ngjarjeje Lëvizja Vetëvendosje është deklaruar se nuk qëndron pas këtij akti, mirëpo pas arrestimit të të pandehurit rezulton se i njejti është anëtar i kësaj lëvizjeje”.
Prokurori i rastit ka kërkuar nga gjykata që “të pandehurin ta shpallë fajtor dhe ta dënoj sipas ligjit”, thuhet në fund të njoftimit të Prokurorisë Themelore në Prishtinë.
