Forum
Arian Krasniqi përgjigjet në pyetjet tuaja
03.09.2009 Të nderuar lexues, mysafiri ynë i radhës në rubrikën "Intervista online" është dramaturgu Arian Krasniqi.
Ju mund të shtroni pyetje nga më të ndryshmet për të mësuar më shumë për jetën dhe veprimtarinë e tij dhe përgjigjet do t’i merrni nga vetë ai, pasi të jetë mbyllur forumi.
Arian Krasniqi, dramaturg, i lindur më 07. 08. 1981, në Prishtinë. Në vitin 2004 ka përfunduar studimet në Degën e Arteve Dramatike, drejtimi i Dramaturgjisë në Fakultetin e Arteve në Universitetin e Prishtinës. Aktualisht është në përfundim të studimeve postdiplomike (master) në dramaturgji.
Ai ka bërë inskenimin e një varg dramash, sikurse : “Gogoli” në teatrin “Oda” në Prishtinë (2004), “Gruaja në kornizë” (2003) dhe “Turni i natës” (2004) në teatrin Dodona në Prishtinë, “Gjashtë” në Teatrin Kombëtar të Kosovës (2005). Kjo shfaqje me regji të Krasniqit ka marrë pjesë në Festivalin Ndërkombëtar të Teatrove Eksperimentale në Kairo të Egjiptit, prej 20-30 shtator 2005.
Ai ka në dorëshkrime edhe një varg dramash të zhanreve të ndryshme, ndërkaq skenarët e realizuar deri më tash janë: “Vallëzimi në hënë” - film i metrazhit të shkurtër (në konkurencë në Festivalin Nine Eleven, 2003, në Prishtinë), TV novela “Zemër e vetmuar” (në 10 episode në RTV 21, 2003-2004), “BUS”- film i metrazhit të shkurtër, 2004 (Pjesëmarrës në Festivalin Evropian të Filmit të Shkurtër në Karlsruhe të Gjermanisë, 2005), “Green Card” - film i metrazhit të shkurtër, (fitues i çmimit Skenari më i Mirë në Festivalin Nine Eleven në Prishtinë, 2005), “Sakica” - film i metrazhit të shkurtër, (fitues i çmimit Skenari më i Mirë në Festivalin Nine Eleven në Prishtinë, 2006) dhe “UKA” - film dokumentar (kushtuar jetës dhe veprës së veprimtarit Ukë Bytyqi), 2007.
Gjatë viteve 1999-2000 ka punuar si gazetar për kulturë në gazetën “Kosova sot”; më 2000-2001 ka qenë themelues dhe drejtues i revistës për të rinj “MILENIUMI”; më 2003-2007, zyrtar për ndërlidhje me media në Zyrën e presidentit të Kosovës.
Gjatë vitit 2007 ka qenë zyrtar për informim në Agjencinë Kosovare të Pronës (KPA) dhe gjatë viteve 2008-2009 drejtor i Teatrit Kombëtar të Kosovës. Drejtues i Organizartës “Paneuropa-Kosova” si Degë e Unionit Panevropian Ndërkombëtar në Kosovë. Pjesëmarrës në shumë konferenca, seminare dhe trajnime ndërkombëtare, si në Uashington, Londër, Vjenë, Gjenevë, Bruksel, Paris, Strasburg, Blagoevgrad, Stamboll, Sarajevë etj.