Dyshohet se militantë të armatosur shiitë, kanë vrarë 46 rivalë sunitë arabë në shenjë hakmarrjeje në qytetin irakian, Balad, që është në veri të Bagdadit. Zyrtarët thonë se vrasjet e bëra dje dhe këto të sotmet qartas ishin hakmarrje për vrasjen e 17 shiitëve, trupat e pajetë të të cilëve u gjetën para dy ditësh me koka të prera. Njëherësh, policia në qytetin Kirkuk tha se sot në pesë sulme ishin vrarë 10 persona. Ushtria e Shteteve të Bashkuara ka njoftuar se tre pjesëtarë të saj ishin vrarë dje në sulme të ndyrshme. Nga një sulm me bombë në Bagdad sot u vranë 7 vetë, ndërsa në Mosul, në orët e para të mëngjesit, u vranë një burrë, gruaja e tij dhe dy djemë të tyre.