BAGDAD

Komisioni Qëndror Zgjedhor në Irak ka bërë të ditur se 57% e 14 milionë votuesve të regjistruar kanë marrë pjesë në votimet e së dielës, duke i tejkaluar parashikimet për pjesëmarrje.
Por disa udhëheqës në rajon, përfshi dhe mbretin e Jordanisë Abdullah, kanë shprehur shqetësimin për pjesëmarrjen e ulët të irakianëve sunitë në këto zgjedhje.
Kryeministri irakian, Ajad Allaui, ka premtuar në një konferencë për shtyp të mbajtur gjatë ditës se do përpiqet për përfaqësimin e gjithë irakianëve në proçeset politike në vend.
"Duke filluar nga sot dhe në gjithë pjesën e mandatit që më ka mbetur, do të fillojë një dialog kombëtar që të sigurojë se të gjithë irakianët do të kenë zërin e tyre përfaqësues në qeverinë e ardhshme", tha Allaui.
Zëdhënësi i Shtëpisë së Bardhë, Scott McClellan, ka përsëritur mbështetjen amerikane për Irakun.
"Ne do vazhdojmë të bëjmë gjithçka është e mundur të mbështesim Irakun, që të ecë përpara. Kjo do të thotë përmbushja e misionit për ta çuar Irakun në rrugën drejt të ardhmes demokratike dhe t'i mundësojmë që të kenë forca sigurie për t'u mbrojtur dhe për të mundur terroristët", tha McClellan.