Misioni i Fondit Monetar Ndërkombëtar ka kërkuar nga partitë politike në Shqipëri që të mbahet ritmi i reformave në periudhën para zgjedhjeve parlamentare, të parapara për 3 korrik. Shefi i këtij misioni, Julio Escolano ka thënë sot, në një konferencë për gazetarë, se nga Partia Socialiste në pushtet dhe nga partia Demokratike opozitare është kërkuar që të mos e tejkalojnë deficitin e planifikuar buxhetor. Ky mision e përfundoi një qëndrim dyjavësh në Tiranë gjatë së cilit u analizua programi për reduktimin e varfërisë, i cili ka filluar në qershor të vitit 2002 dhe zgjatë deri në nëntor të këtij viti. Për këtë projekt Fondi Monetar Ndërkombëtar kishte dhënë 42,7 milionë dollarë.