Shefi i administratës së UNMIK-ut, Harri Holkeri, ka shpallur 23 tetorin e këtij viti, si datën e zgjedhjeve të dyta parlamentare në Kosovë, që nga përfundimi i luftës. Holkeri tha se është përcaktuar që edhe këto zgjedhje të mbahen me sistem proporcional dhe lista të mbyllura, përkundër kundërshtimeve të disa subjekteve politike dhe shoqërisë civile. Këtë vendim, Holkeri e shpalli në prani të nënsekretarit të përgjithsëm të Kombeve të Bashkuara, Jean Marie Guehnno, i cili në përmbyllje të vizitës pesëditëshe në Kosovë, tha se ekzistimi i strukturave paralele është i papranueshëm.
