Presidenti George Bush ka deklaruar se Shtetet e Bashkuara do të ndihmojnë Afganistanin në zhvillimin e ushtrisë si dhe me një fond shtesë prej 50 milion dollarësh për biznesin privat dhe sipërmarrjet e këtij vendi të rrënuar nga lufta. Komenti i presidentit Bush pason takimin mes tij dhe udhëheqësit të përkohshëm të Afganistanit, Hamid Karzai. Më herët zoti Karzai mbajti një fjalim në Universitetin Xhorxhtaun, ku ftoi anëtarët e komunitetit afgano-amerikan, të rikthehen në Afganistan për të ndihmuar në rimëkëmbjen e vendit.
