Bashkimi Evropian ka ftuar liderët politikë të Serbisë që të heqin dorë nga izolacionizmi dhe të mbajnë vendin e tyre në drejtim të anëtarësimit në Bashkimin Evropian.
Para fillimit të takimit të ministrave të Jashtëm, Javier Solana, shef për politikë të Jashtme dhe Siguri të BE-së, ka thënë se shpreson që serbët "të shkojnë drejt marrëdhënieve më të thella dhe më solide me Bashkimin Evropian".
Pas dorëheqjes së kryeministrit Koshtunica, pritet që presidenti i Serbisë, Boris Tadiq, gjatë kësaj jave, të konvokojë zgjedhjet e jashtëzakonshme. Zgjedhjet, sipas të gjitha gjasave, do të mbahen në muajin maj.
Ministri i Jashtëm i Sllovenisë ka deklaruar se Serbia nuk ka rrugë tjetër pos Bashkimit Evropian, ndërsa ministri i Jashtëm i Suedisë, Carl Bildt, ka deklaruar se zgjedhjet janë "rast që Serbia të zgjedhë Evropën në formë më të vendosur sa më parë".
"Nëse Serbia zgjedh vetizolimin, kjo do të jetë e dëmshme për ekonominë dhe politikën e saj, por edhe të rajonit", ka thënë Carl Bildt.