"E ardhmja e Kosovës do të jetë e shkëlqyer. Kosova ka popull të vendosur, udhëheqje të vendosur dhe miq të vendosur", tha Sekretarja amerikane e Shtetit, Condoleezza Rice pas takimit me krerët më të lartë të shtetit të Kosovës.
Rice, ashtu si presidenti Fatmir Sejdiu dhe kryeministri Hashim Thaçi e cilësuan vizitën në Departamentin e Shtetit si "historike".
Sipas Rice kjo vizitë është një tregues më shumë i përkushtimit amerikan në Kosovë.
"Shtetet e Bashkuara do vazhdojnë ta ndihmojnë Kosovën, derisa ajo ndërton qeverisjen shumëetnike dhe institucionet demokratike", tha Rice.
Në këtë frymë ishin dhe deklaratat e udhëheqësve të Kosovës.
"Kemi objektiv që të ndërtojmë një Kosovë të vlerave më sublime demokratike dhe atdhe i të gjithëve", tha presidenti Sejdiu.
Ndërtimi i strukturave demokratike është nënvizuar si garancia e Kosovës për tu përfshirë në arenën ndërkombëtare dhe për të çuar përpara procesin e njohjes.
"Më shumë se 40 vende e kanë njohur Kosovën, përfshi mbi 2/3 e vendeve anëtare të Bashkimit Evropian dhe NATO-s si dhe shumica e shteteve anëtare të Këshillit të Sigurimit", tha Rice.
Ajo shtoi se do ketë njohje të reja të pavarësisë së Kosovës, derisa për kundërshtuesit e pavarësisë tha:
"Ata që nuk dashur të shihnin një Kosovë të pavarur duhet ta dinë se tashmë ekziston Kosova e pavarur dhe do vazhdojë të jetë."
Ajo shtoi se Bashkimi Evropian është e ardhmja e Kosovës dhe Serbisë.
"E ardhmja e të dyja vendeve, Kosovës dhe Sebisë është në Evropë", tha Rice.
Ky qëndrim u shpreh edhe nga kryeministri i Kosovës, Hashim Thaçi i cili nënvizoi të ardhmen e euroatlantike të Kosovës në fqinjësi të mirë me Shqipërinë, Maqedoninë, Malin e Zi dhe në të ardhmen edhe me Serbinë.
Pas takimit me Condoleezza Rice, presidenti Sejdiu dhe kryeministri Thaçi janë pritur në Pentagon nga Sekretari amerikan i Mbrojtjes, Robert Gates.
Më 21 korrik delegacioni shtetëror i Kosovës do takohet me presidentin amerikan, George Bush.