Kthimi i 310 policëve serbë në vendet e tyre të punës është vlerësuar si veprim i duhur nga liderët serbë, që jetojnë në pjesën qendrore të Kosovës. Por, kështu nuk mendojnë politikanët e veriut, të cilët ndjehen të tradhtuar nga policët, që pas 16 muajve vendosën t’u rikthehen uniformave të policisë.
Marko Jakshiq, nënkryetar i organit paralel të quajtur Kuvendi i komunave dhe vendbanimeve serbe të Kosovës, shfaq drojën se mos serbët e kthyer kanë pranuar pavarësinë e Kosovës.
Do të ishte keq nëse këta policë që janë kthyer në vendet e punës, kanë pranuar pavarësinë...
“Do të ishte keq nëse këta policë që janë kthyer në vendet e punës, kanë pranuar pavarësinë, sepse pa marrë parasysh se si tingëllon kjo, ata duhet t’i ndihmojnë serbët, popullin serb".
"Por, nëse kjo ndihmë është e kushtëzuar me pranimin e pavarësisë, atëherë shtrohet pyetja se çfarë ndihme është në të vërtetë kjo, sepse për serbët nuk ka jetë në Kosovën e pavarur”, shprehet Jakshiq, i cili kërkon të dijë se nën cilat kushte janë kthyer serbët në vendet e lëna bosh menjëherë pas shpalljes së pavarësisë së Kosovës.
“Nuk i di saktë kushtet nën të cilat serbët janë kthyer në vendet e punës. Nuk e dimë nëse këta policë duhet të veshin uniformën e shtetit të vetëshpallur të Kosovës. Është përmendur një komandë unike - a nënkupton kjo se Ministria e Punëve të Brendshme është përgjegjëse për punën e tyre? Me çfarë ligjesh do të punojnë ata? Në publik, asgjë nga këto nuk është qartësuar”, thotë Jakshiq.
Në anën tjetër, kreu i Këshillit Kombëtar Serb për veriun e Kosovës, Millan Ivanoviq, kërkon nga serbët që të distancohen nga institucionet e Kosovës.
"Nën këto kushte, ky kthim mund të jetë pozitiv. Pra, të distancohen nga institucionet shqiptare, si institucione të një shteti që serbët nuk e njohin”, konsideron Ivanoviq.
Por, reagim krejt tjetër për kthimin e policëve serbë ka Rangjel Nojkiq, politikan serb i Graçanicës. Ai e vlerëson si hap të mençur kthimin e policëve, të cilëve, po qe se nuk do të ktheheshin pasditen e djeshme, do t’iu shkëputej kontrata e punës.
“Është lajm i mirë. Mendoj se në këtë mënyrë do të përmirësohet gabimi i bërë. Mendoj se në këtë formë do të relaksohen raportet. Madje, më duhet t’i falënderoj pjesëtarët e SHPK-së që në ditën e Vidovdanit kanë kryer me shumë profesionalizëm punën e tyre, pa marrë parasysh se në atë përbërje nuk ka pasur numër të mjaftueshëm të përfaqësuesve (policëve) serbë”, thotë Nojkiq.
Mbi 300 policë serbë kanë pasur statusin e të suspenduarit me pagesë për më shumë se një vit. Të nxitur nga Beogradi zyrtar, ata patën braktisur vendet e tyre të punës, për shkak se nuk dëshironin t’i bindeshin zinxhirit komandues të Policisë së Kosovës.
Serbët kanë kërkuar që të zbatohej plani gjashtëpikësh i Ban Ki Munit, i cili për policinë parashihte krijimin e dy zinxhirëve komandues.
Sidoqoftë, Ministria e Punëve të Brendshme siguron se nuk ka pasur asnjë kusht për kthimin e djeshëm të 310 policëve serbë. Ata premtojnë se edhe më tej do të mbetet vetëm një komandë unike për të gjithë policët gjithandej Kosovës.
